Երեւի չկա այնպիսի կառավարություն, որի տակը ինչ-որ ուժեր չուզեն փորել։ Փորում են, հիմքը խարխլում եւ իրենց տեղն ապահովում։ Բայց այս անգամ խոսքը ուղիղ իմաստով փորելու մասին է։
Լուսանկարում պատկերված այս պապիկը խիստ եռանդուն փորում էր կառավարության «տակը»։ Այս մարդը հաստատ կառավարությունում իր տեղն ապահովելու մտադրություն չունի։ Պարզապես իր գործն է անում. փողոցային անցումի այդ հատվածը երեւի պետք է հարմարեցվի միջազգային չափանիշներին։ Տարօրինակ զուգադիպությամբ, երբ լուսանկարում էի պապիկին, մոտեցավ մեկը, որը խիստ կասկածելի հայացքով զննելով ինձ էլ, լուսանկարչական ապարատն էլ, ինձ անվանեց միջազգային հատուկ ծառայությունների աշխատակից։ Մարդը կրքոտ պաշտպանում էր իր կառավարության մայթը եւ արգելում էր լուսանկարել։ Ի վերջո կնճիռը հարթվեց։ Բայց հուսադրող մի բան մնաց. ամեն ինչ դեռ անհուսալի կորած չէ։ Եթե պատահական մի անցորդ պատրաստ է պաշտպանել իր «կառավարական» մայթը, ուրեմն «փորողները» դեռ երկար են քրտինք թափելու։
Մ. Ե.
