Քննարկելով «Առավոտ» օրաթերթի 2001թ. մարտի 6-ի համարում տպագրված «Սպիդը դուրս եկավ «խոցելի խմբից» հոդվածում (ինչպես նաեւ զանգվածային լրատվության այլ միջոցներում այդ հարցին նվիրված նույնաբովանդակ մյուս հրապարակումներում) արծարծված փաստերի կապակցությամբ նախապատրաստված նյութերը, ՀՀ գլխավոր դատախազության պետական շահերի պաշտպանության վարչությունը պարզել է, որ պրոֆ. Ռ. Յոլյանի անվան արյունաբանության կենտրոնում, խախտելով ՀՀ առողջապահության նախարարության համապատասխան հրամանները, իրենց մոտ բուժվող երեխայի մորից, առանց մանրակրկիտ հետազոտման, 2001թ. հունվարի 5-ին վերցվել է դոնորական արյուն, որը նույն օրը ներարկման համար բաց է թողնվել անհայտ անձի։ Եվ միայն 2001թ. հունվարի 23-ին հայտնի է դարձել, որ ինչպես բուժման համար արդյունաբերության կենտրոնում գտնվող երեխան, այնպես էլ դոնորական արյուն հանձնած նրա մայրը վարակված են մարդու իմունային անբավարարության վիրուսով (СПИД)։
Հանրապետական դատախազությունից «Առավոտին» հայտնեցին, որ հիմք ունենալով անցկացված ստուգումների արդյունքները եւ նկատի ունենալով, որ արյունաբանական կենտրոնի առանձին աշխատակիցների գործողություններում առկա են ՀՀ քրեական օրենսգրքի 239 հոդվածով նախատեսված հանցագործության հատկանիշները մատնանշող բավարար հիմքեր՝ որոշում է կայացվել վարակիչ հիվանդությունները կանխելու եւ դրանց դեմ պայքարելու նպատակով սահմանված պարտադիր կանոնները խախտելու փաստի առթիվ հարուցել քրեական գործ՝ ՀՀ քրեական օրենսգրքի նշված հոդվածով։
