ՍՊԱՍՎԱԾ ԲԱՐԵՓՈԽՈՒՄՆԵՐ Նախագահ Ռոբերտ Քոչարյանը դեկտեմբերի 17-ին հրամանագիր է ստորագրել ՀՀ կառավարության կառուցվածքում փոփոխություններ կատարելու մասին: Հրամանագրի համաձայն, ՀՀ Ազգային անվտանգության նախարարությունը վերակազմավորվել է ՀՀ կառավարությանն առընթեր ազգային անվտանգության ծառայության, իսկ ՀՀ ներքին գործերի նախարարությունը՝ ՀՀ կառավարությանն առընթեր Հայաստանի Հանրապետության ոստիկանության: Հրամանագրով սահմանվում է նաեւ, որ մինչեւ պետական կառավարման համակարգի բարեփոխումների գործընթացի ավարտը գործում են ՀՀ կառավարությանն առընթեր պետական կառավարման հետեւյալ մարմինները՝ 1. Ազգային անվտանգության ծառայություն, 2. Անշարժ գույքի կադաստրի պետական կոմիտե, 3. Արտակարգ իրավիճակների վարչություն, 4. Հարկային պետական ծառայություն, 5. Մաքսային պետական կոմիտե, 6. Միգրացիայի եւ փախստականների վարչություն, 7. Հայաստանի Հանրապետության ոստիկանություն, 8. Ջրային տնտեսության պետական կոմիտե, 9. Քաղաքացիական ավիացիայի գլխավոր վարչություն: Ղեկավարվելով ՀՀ Սահմանադրությամբ եւ «Ազգային անվտանգության մարմինների մասին» օրենքով, Ռոբերտ Քոչարյանը հրամանագիր է ստորագրել նաեւ ՀՀ ազգային անվտանգության նախարարի պաշտոնից Կառլոս Պետրոսյանին ազատելու եւ ՀՀ ազգային անվտանգության ծառայության տնօրեն նշանակելու մասին: Զբաղեցրած պաշտոնից ազատվել է նաեւ ՆԳ նախարար Հայկ Հարությունյանը: Նախագահի հրամանագրով նա նշանակվել է ՀՀ ոստիկանության պետ:
