ՑՈՒՑԱՐԱՐՆԵՐԸ ԽՈՍՏԱՆՈՒՄ ԵՆ ՄԵՐԿԱՆԱԼ «Լոքյան, մի լռվի, պատասխան տուր, էս ո՞ւմ հողն ա»,- երեկ կառավարության շենքի մոտ ցույցի եկած Դալմայի այգու վարձակալներն այս հարցով դիմավորեցին գյուղատնտեսության նախարար Դավիթ Լոքյանին: Ցուցարարների գոռոցներին նախարարը ջանում էր հանգիստ պատասխանել. «260 հեկտար այգին կպահպանվի, մնացած զավթված տարածքների այգու վարձակալներին կտրվի փոխհատուցում կամ այգի՝ մի ուրիշ տեղ»: Ավելի ուշ վարձակալները շուրջկալի մեջ առան քաղաքապետին: Նա ասաց, որ 260 հեկտար տարածք զբաղեցրած վարձակալների հետ կկնքվի պայմանագիր, 150 հեկտարի մասով կլինի փոխհատուցում: Ցուցարարները եկել էին պահանջով՝ չեղյալ համարել Դալմայի այգիները աճուրդի հանելու որոշումը: «Թե բան չփոխվի, կգնանք նախագահի մոտ՝ հացադուլի»,- ասաց հողօգտագործող պարոն Պատվականն ու երդվեց, որ թույլ չի տա իր հողամասը «պարտքի դիմաց տան «Հայռուսգազարդին»: Մի քանի կին որոշեցին մերկանալ կառավարության շենքի մոտ, սակայն թզի տերեւների բացակայության պատճառով որոշումը հետաձգվեց՝ մինչեւ հաջորդ ցույց: Վարձակալ Սուրեն Մելիքյանը ստեղծված իրավիճակի համար մեղավոր է համարում քաղաքի մեծահարուստներին. «Նրանք մտադիր են Դալմայի այգու փոխարեն երկու մեծ թաղամաս կառուցել հարուստների համար»: Ըստ էության, չբավարարվելով քաղաքապետի եւ գյուղնախարարի պարզաբանումներից, ցուցարարները շուրջ վեց ժամ չցրվեցին՝ հույս ունենալով հանդիպել նաեւ վարչապետի հետ: Ի վերջո, զգալով, որ սպասումն անիմաստ է՝ հեռացան: ՀՐԱՉՈՒՀԻ ԵՐԱՆՈՍՅԱՆ