«ՄԻՆՉԵՎ ՀԻՄԱ ԷԼ ԼՑՈՆՈՒՄՆԵՐ ԵՎ
ԿԱՐՈՒՍԵԼՆԵՐ ՉԿԱՅԻՆ»

Վարչապետ
Անդրանիկ Մարգարյանը երեկ խորհրդարանում պատասխանեց լրատվամիջոցների ներկայացուցիչների
հարցերին: Ներկայացնում ենք «Առավոտի» հարցերին վարչապետի պատասխանները: –
Պարոն վարչապետ, փաստորեն այսօր ՀՀԿ-ն վերցրել է երկրի երկու կարեւոր պաշտոնները՝
վարչապետ եւ Ազգային ժողովի նախագահ: Այսպիսով, պատասխանատվության բեռը կրկնակի մեծացել
է. ի՞նչ հիմքեր ունեք նման ինքնավստահության՝ համարձակվելով վերցնել այս պաշտոնները:
Ի վերջո, մենք չավարտված պատերազմի վիճակում գտնվող պետություն ենք, եւ շատ կարեւոր
պաշտոններ դրված են մեկ կուսակցության ուսերին, ո՞նց եք տակից դուրս գալու: –
Մենք ուղղակի չենք խուսափում պատասխանատվությունից եւ պարտք ունենք կատարելու, եւ
եթե մտել ենք քաղաքականության մեջ եւ ընտրություններին գնացինք որոշակի ծրագրերով,
հետեւաբար պատկերացնում էինք, թե ինչպիսի ծանրություն կարող էինք ունենալ եւ դրան
պատրաստ էինք: – Ինչո՞վ եք բացատրում, որ հանրապետության ուսուցիչներն ու
մանկավարժներն այսքան բուռն թափով հիմա էլ մղվում են դեպի «Հանրապետական» կուսակցություն
եւ դառնում են ձեր կուսակցության անդամներ, դուք մտավախություն չունե՞ք, որ կրկնում
եք ՕԵԿ-ի ճանապարհը: – Ոչ, արտառոց ոչ մի բան չի եղել, այդպիսի հոսք չկա,
ուղղակի մենք մեկ անգամ ցույց տվեցինք, որ այդպիսի գործընթաց գնում է, բայց այս գործընթացը
մշտական է եղել, եւ դա ոչ միայն մանկավարժների, այլեւ տարբեր բնագավառի մարդկանց
հետ է կապված: «Հանրապետականը», եթե հիշում եք, իր համագումարում հայտարարեց, որ
տեղի է ունենալու շարքերի թարմացում. եթե մի քանի հազար հոգի մտել են, ապա դրանից
ավելի շատ մենք հեռացրել ենք կուսակցությունից, մաքրել ենք պատեհապաշտներից կամ,
ասենք, ցուցակային մարդկանցից: Տարիներ են անցնում, մարդիկ ցուցակագրվում են, ակտիվ
չեն աշխատում, բնականաբար, մենք չենք ցանկանա ուռճացնել կուսակցության թիվը: Տեղի
ունեցավ շարքերի հաշվառում, մի մասը հեռացվեց, մի մասն ինքն է դուրս եկել մինչ այդ՝
ուղղակի հանրապետությունում չգտնվելու կամ այլ կուսակցության անդամակցելու պատճառով:
Այնպես որ, յուրաքանչյուր կուսակցության հատուկ նորմալ ընթացող գործընթաց է, հարկավոր
չի սենսացիաներ փնտրել այդպիսի գործողություններում: – Դատելով գլխավոր դատախազ-ՀՅԴ
հակասությունից, համենայնդեպս, մամուլում այդպես է երեւում, կարո՞ղ ենք ասել, որ
իշխանության ներսում սկանդալ է հասունանում կամ՝ գոյություն ունի: – Ոչ, մասնավոր
դեպք է եղել, իմ կարծիքով՝ դա կհարթվի: – Հայտնի է, եւ դուք էլ չեք թաքցնում,
որ որոշ ընդդիմադիր գործիչների հետ ունեք նորմալ, մարդկային, ընկերական հարաբերություններ:
Դատելով այն իրողությունից, որ ՕԵԿ նախագահ, ԱԺ նախկին նախագահ Արթուր Բաղդասարյանը
հեռացավ ընդդիմադիր դաշտ՝ հայտարարելով, որ գործելու է ընդդիմադիր դաշտում, կարո՞ղ
ենք ենթադրել, որ նրա հետ հարաբերությունները այսուհետեւ ավելի կջերմանան: –
Ջերմ եղել են եւ, իմ կարծիքով, այդպես էլ կշարունակվեն: -Հրաժարականից հետո
հանդիպե՞լ եք Արթուր Բաղդասարյանի հետ: – Մեկ անգամ, բայց մտադիր ենք նորից
հանդիպել կուսակցություններով: – Ամոթ չլինի հարցնելը, ի՞նչ հարց եք քննարկել:
– Մեր հետագա համագործակցությունը: – Ձեր կառավարությունը պատրաստվում
է պաշտոնավարել մինչ նոր ընտրություննե՞ր, թե՞ կլինի այլ սցենար, ասենք՝ հրաժարականներ
եւ այլն: – Համենայնդեպս, այդպիսի պատճառ չեմ տեսնում, որ կառավարությունը
հրաժարական տա: – Ակնհայտորեն, ընտրություններից առաջ մեծանում է իշխանությանը
հարող եւ իշխանական կուսակցությունների թիվը: Սա կարո՞ղ է ենթադրության հիմք տալ,
որ նրանք, ովքեր այսօր ընդդիմության դաշտում են, չեն էլ կարող երազել խորհրդարան
մտնելու մասին, քանի որ այլեւս տեղ չի մնա: – Ո՞վ ասաց, իմ կարծիքով՝ ժողովուրդն
ինքն է որոշում, թե ով կգա Ազգային ժողով, եւ ոչ թե պլանավորում են: – Այսինքն՝
այլեւս լցոնումներ եւ կարուսելներ չե՞ն լինելու: – Մինչեւ հիմա էլ չկային:
– «Իրավունք» թերթին տրված հարցազրույցում ՀՅԴ բյուրոյի ներկայացուցիչ Հրանտ
Մարգարյանը, բավականին ուղիղ, բոլոր պաշտոնյաներին եւ կառավարությանը մեղադրեց կոռումպացված
լինելու մեջ: Ո՞նց եք գնահատում, որ գտնվելով իշխանության մեջ՝ Դաշնակցությունը նման
գնահատականներ է տալիս կառավարությանը: – Չէ, բայց գիտե՞ք ինչ, դուք ծանոթ
եք մեր հակակոռուպցիոն ծրագրին, մենք ինքներս չենք թաքցնում, որ կոռուպցիա գոյություն
ունի եւ պետական ապարատում, եւ տարբեր սեկտորներում, այնպես որ՝ Հրանտը նոր բան չի
ասել, ասել է այն, ինչ կառավարությունն ինքը հայտարարել է: Ես դա նորմալ եմ համարում,
հենց դրա համար էլ մենք պայքարում ենք կոռուպցիայի դեմ: – Հնարավո՞ր է պետության
կառավարման ինչ-ինչ հարցերում ԱԺ-կառավարություն հարաբերություններում սրվեն Տիգրան
Թորոսյան-Անդրանիկ Մարգարյան հարաբերությունները: – Եթե օբյեկտիվ պատճառներ
լինեն, ես դա հնարավոր համարում եմ, սակայն դա էական ազդեցություն չի թողնի երկրի
զարգացման կամ Ազգային ժողով-կառավարություն հարաբերություններում, բայց իրականում
դա բացառվում է: ՄԱՐԳԱՐԻՏ ԵՍԱՅԱՆ