«Նիգը» դուրս մնաց պայքարից
Ֆուտբոլի «Նորվեգիայի գավաթի» խաղարկությունում Երեւանի «Քոլեջ» մարզական ակումբի «Նիգ»՝ մինչեւ 19 տարեկան աղջիկների թիմը 1/16 եզրափակիչում 0:1 հաշվով զիջելով Նորվեգիայի «Ֆարտ» թիմին՝ դուրս մնաց հետագա պայքարից:
Խաղը նախապես նշանակված էր «Էքիբերգի» 4-րդ խաղադաշտում: Սակայն նախորդ օրը տեղացած հորդառատ անձրեւի եւ գազոնը ժամանակավորապես անօգտագործելի դառնալու պատճառով մրցաշարի քարտուղարությունը որոշեց այն տեղափոխել Ռուսդադի արհեստական ծածկով խաղադաշտ:
«Նիգի» ֆուտբոլիստուհիները, ունենալով տարածքային ու խաղային նկատելի առավելություն, չկարողացան օգտագործել ստեղծված բազմաթիվ գոլային պահերը եւ հանդիպման առաջին րոպեներին անկյունայինի խաղարկումից խփած «Ֆարտի» անհեթեթ գոլը վճռորոշ դարձավ:
Արաբկիր թաղապետարանի ինֆորմացիոն աջակցությամբ՝
ԱՇՈՏ ՀԱԿՈԲՅԱՆ
Օսլո
Հաղթեց Կրամնիկը
Դորտմունդում օգոստոսի 6-ին ավարտվեց աշխարհի 8 ուժեղագույն գրոսմայստերների մասնակցությամբ 19-րդ կարգի շախմատի միջազգային գերմրցաշարը: Հայաստանցի Լեւոն Արոնյանը 4 անընդմեջ ոչ-ոքիից հետո վերջին 3 պարտիաները տանուլ տվեց: Նա 2 միավորով գրավեց 7-րդ տեղը: 7 հնարավորից 4,5-ական միավոր վաստակեցին Կրամնիկը եւ Սվիդլերը: Հաղթող ճանաչվեց ավելի բարձր գործակիցներ ունեցող Կրամնիկը:
Առաջատարը «Փյունիկն» է
Օգոստոսի 5-ին եւ 6-ին տեղի ունեցան Հայաստանի ֆուտբոլի բարձրագույն խմբի առաջնության 15-րդ փուլի հանդիպումները: Գրանցվեցին հետեւյալ արդյունքները. «Փյունիկ»-«Գանձասար»՝ 5-1, «Շիրակ»-«Միկա»՝ 0-0, «Արարատ»-«Բանանց»՝ 3-0 եւ «Ուլիս»-«Կիլիկիա»՝ 2-3: Մրցաշարային աղյուսակը 43 միավորով գլխավորում է Հայաստանի բազմակի չեմպիոն «Փյունիկը»: 16-րդ փուլի հանդիպումները նշանակված են օգոստոսի 12-ին եւ 13-ին:
Սեփ. լր.
