«BoxingScen.com»-ը տեղեկացնում է, որ ամերիկյան «Showtime» հեռուստաալիքը երկրորդ միջին քաշային կարգում աշխարհի ուժեղագույն բռնցքամարտիկին ի հայտ բերելու նպատակով մտադիր է 2009-2011 թվականներին շրջանաձեւ մրցակարգով մրցաշար կազմակերպել, որին կհաջորդի երկու կիսաեզրափակիչ եւ մեկ եզրափակիչ մարտ: Մրցաշարի կազմակերպման շուրջ բանակցություններն ընթանում են խիստ գաղտնիության պայմաններում եւ «BoxingScen.com»-ի հայթայթած ամբողջ տեղեկատվությունը պաշտոնական չէ: Ակնկալվում է, որ մրցաշարին կմասնակցի վեց բռնցքամարտիկ՝ IBF-ի աշխարհի չեմպիոն՝ միջին քաշային Արթուր Աբրահամը, երկրորդ միջին քաշային կարգում WBA-ի գոտու տիրակալ Միկել Կեսլերը, նույն քաշային կարգում WBC-ի չեմպիոն Կարլ Ֆրոխը, աշխարհի նախկին չեմպիոն (միջին քաշային կարգում) Ջերմեն Թեյլորը եւ ամերիկացի երկու հեռանկարային բռնցքամարտիկներ՝ Անդրե Ուորդն ու Անդրե Դիրրելը: Յուրաքանչյուր բռնցքամարտիկ անցկացնելու է երեքական մարտ, որոնց արդյունքների ամփոփումով կորոշվեն չորս ուժեղագույնները, որոնք էլ օլիմպիական մրցակարգով երեք մենամարտ կանցկացնեն:
Ենթադրվում է, որ շրջանաձեւ մրցաշարը կընթանա այսպիսի սխեմայով.
Արթուր Աբրահամ-Ջերմեն Թեյլոր՝ 2009 թ., հոկտեմբեր, Գերմանիա
Կարլ Ֆրոխ-Անդրե Դիրրել՝ 2009 թ., հոկտեմբեր, Անգլիա
Միկել Կեսլեր-Անդրո Ուորդ՝ 2009թ., նոյեմբեր, վայրը չի նշվում
Աբրահամ-Դիրրել՝ 2010 թ. հունվար, ԱՄՆ
Կեսլեր-Ֆրոխ՝ 2010թ., մարտ, Եվրոպա
Ուորդ-Թեյլոր՝ 2010թ., ապրիլ-մայիս, ԱՄՆ
Դիրրել-Ուորդ՝ 2010 թ., սեպտեմբեր, ԱՄՆ
Աբրահամ-Ֆրոխ՝ 2010 թ., նոյեմբեր, վայրը չի նշվում
Կեսլեր-Թեյլոր՝ 2010 թ., նոյեմբեր, վայրը չի նշվում:
Այս մենամարտերի արդյունքների ամփոփումից հետո կկայանան կիսաեզրափակիչ երկու եւ եզրափակիչ հանդիպումները:
