Երգահան Ռուբեն Հախվերդյանը, ըստ tert.am-ի, երեկ լրագրողների հետ հանդիպման ժամանակ չի բացահայտել հուլիսի 7-ին կայանալիք համերգի մանրամասները։ «Մարդիկ պետք է գան եւ լսեն»,- հայտարարել է նա՝ հավելելով, որ համերգի ընթացքում կհնչի նաեւ իր վերջին «Կտակ» երգը։ Նոր ձայնասկավառակների բացակայությունը Հախվերդյանը բացատրել է ֆինանսների բացակայությամբ, քանի որ նոր CD-ի թողարկման համար «անհրաժեշտ է առնվազն 20 հազար դոլար»։
Խոսելով ստեղծագործական ուղու մասին՝ երգիչը նշել է, որ ինքն արվեստում բուռն եւ արգասաբեր ժամանակաշրջան չի ունեցել։ «Դա իմ արվեստն է, եւ երբ ինչ-որ մի բան լավ է ստացվում, ես ուրախանում եմ այնպես, ինչպես, ասենք, վոդոպրովոդչիկը»,- բացատրել է երգահանը։ Նրա խոսքերով՝ երգը ստուգվում է լսարանի կողմից։ Միեւնույն ժամանակ, Հախվերդյանը հավելել է, որ անձամբ ինքը չի սիրում իր երգերը։ Նրա բացատրություններով՝ երգ գրելու գործընթացը կատարելագործման գործընթաց է, որից հետո «զզվում ես արդյունքից»։ «Երգը մատուցելու եւ կատարելու ժամանակ դու անկեղծ ես, դա առհասարակ հոգեւոր ստրիպտիզ է։ Նույն ստրիպտիզն է, ուղղակի հոգիդ ես բաց անում»,- եզրափակել է երգիչը։