ՊԵՏԴԵՊԻՆ ԴՈՒՐ ՉԻ ԵԿԵԼ ՄԵԴՎԵԴԵՎԻ ԱՅՑԸ ՑԽԻՆՎԱԼ
«Ռուսաստանի նախագահ Դմիտրի Մեդվեդեւի այցը Հարավային Օսիայի մայրաքաղաք Ցխինվալ չի հանդիսանում մեկ քայլ դեպի տարածաշրջանային կայունություն»: Այս մասին հայտարարել է ԱՄՆ պետդեպարտամենտի պաշտոնական ներկայացուցիչ Իան Քելլին՝ երեքշաբթի ճեպազրույցի ժամանակ:
Նշենք, որ Ռուսաստանի նախագահ Դմիտրի Մեդվեդեւը երկուշաբթի առաջին անգամ այցելել է Հարավային Օսիա, որի անկախությունը Մոսկվան ճանաչել է 2008թ.-ին: Ռուսաստանի առաջնորդը խոստացել է Օսիայի վերականգնման աշխատանքներում Ռուսաստանի կողմից շարունակական օգնություն:
Ըստ ամերիկյան արտաքին քաղաքականության ներկայացուցչի խոսքի, Մեդվեդեւի այցը Հարավային Օսիա պարզապես եւս մեկ անգամ հիշեցնում է տարածաշրջանում Ռուսաստանի եւ ԱՄՆ-ի տարաձայնությունների մասին: Ինչպես հաղորդում է «Ռիա Նովոստին», նա նաեւ հիշեցրել է, որ նախագահ Օբաման, հերթական անգամ հայտարարել է Վրաստանի տարածքային ամբողջականության պահպանման մասին:
«Ես կարծում եմ, որ Ռուսաստանից բացի՝ միակ երկիրը Նիկարագուան է, որը ճանաչել է Աբխազիայի եւ Հարավային Օսիայի անկախությունը»,- ասել է Քելլին:
Նա նաեւ հավելել է, որ ԱՄՆ-ն կոչ է անում Ռուսաստանին հարգել Վրաստանի անկախությունը եւ տարածքային ամբողջականությունը, ապահովել տարածաշրջանի կայունությունը, մասնակցել ժնեւյան բանակցություններին եւ կատարել պարտավորությունները, որոնք ստանձնել է՝ համաձայն 2008թ.-ի օգոստոսի 12-ի զինադադարի համաձայնագրի:
