Համաշխարհային բանկը 2010 թ. համար Հայաստանի ՀՆԱ աճի կանխատեսումը 2%-ից բարձրացրել է մինչեւ 4-5%: Ինչպես տեղեկացնում է «Արմինֆոն»՝ երեկ կայացած մամուլի ասուլիսում ՀԲ երեւանյան գրասենյակի ղեկավար Արիստոմենե Վարուդակիսն ասել է. «Մեծ աճի պետք չէ սպասել, քանի որ Հայաստանի կառավարությունն ունի տնտեսությունը խթանելու նպատակով արտաքին փոխառությունների ներգրավման սահմանափակումներ՝ կապված արտաքին պարտքի մարման հետ»: Նրա կարծիքով, ինչ-որ չափով կաճի շինարարության հատվածը, չնայած որ այդ ոլորտում առաջարկը հաճախ է գերազանցում պահանջարկին, ինչը եւ զսպում է աճը: Գունավոր մետաղների նկատմամբ համաշխարհային պահանջարկի աճը կբերի լեռնարդյունաբերության եւ մետալուրգիայի ոլորտների աճին, ավելացրել է նա: Ինչ վերաբերում է ինֆլյացիային, ապա 2010 թվականի առաջին ամիսներին դրա բարձր տեմպերը տարեվերջին կդանդաղեն: Հայաստանում ինֆլյացիայի մակարդակը հիմնականում կախված է սննդամթերքի եւ վառելիքի համաշխարհային գների աճից, ասել է Ա. Վարուդակիսը: Հիշեցնենք, որ 2010 թ. ՀՀ բյուջեով նախատեսված է 1.2% տնտեսական աճ, իսկ ինֆլյացիան՝ 4+1.5% մակարդակի սահմաններում:
