![\"\"](\"https://www.aravot.am/2011/aravot_arm/April/1/p14.jpg\")
«Միասնական հայրենիք» հիմնադրամի տարածած հաղորդագրության համաձայն, հիմնադրամը սկսել է «Գյուղական ճանապարհներ» ծրագիրը, որի նպատակն է գյուղական ճանապարհների բարեկարգումն ու ասֆալտապատումը: Արարատի մարզի Լանջազատ գյուղում աշխատանքներն արդեն սկսվել են:
Ըստ հիմնադրամի նախագահ Անդրանիկ Նիկողոսյանի, ծրագիրը սկսվել է Լանջազատից, քանի որ այս գյուղի բնակիչներին ճանապարհները նորոգելու խոստում էր տրվել 2008 թվականի նախագահական ընտրությունների քարոզարշավի ընթացքում: Անդրանիկ Նիկողոսյանը չի ասում, թե այդ ընտրություններին մասնակցած 9 թեկնածուներից ով է Լանջազատին նման խոստում տվել, սակայն հաղորդագրության հետ ուղարկված նկարից առավել քան ակնհայտ է, թե ում խոստումն է կատարում «Միասնական հայրենիքը»: Հիմնադրամը չի տեղեկացնում նաեւ, թե ինչու է խոստումը կատարվում երեք տարի ուշացումով, չնայած Անդրանիկ Նիկողոսյանը կարեւորում է նախընտրական խոստումներին հետամուտ լինելու անհրաժեշտությունը եւ հավելում. «ցավոք, ոմանք չեն գիտակցում մարդկանց սպասումները իրենց խոսքից»:
Հաղորդագրության տեղեկատվական բացերը լրացնելու համար դիմեցինք «Միասնական հայրենիք» հիմնադրամին: Պարզվեց՝ Անդրանիկ Նիկողոսյանը գործուղման է: Բայց մեզ խոստացել են, որ վերադառնալուն պես նա կպատասխանի մեր հարցերին:
