Մայրաքաղաքի «Դինամո» մարզադահլիճում ավարտվեց հունահռոմեական ըմբշամարտի Հայաստանի պատանեկան առաջնությունը, որին մասնակցեցին հիմնականում Երեւանի, Գյումրիի, Վանաձորի, Էջմիածնի ու հանրապետությունում մարզաձեւի կենտրոններ համարվող մի քանի մարզերի եւ քաղաքների 204 մարզիկներ:
Ըստ քաշային կարգերի հաղթողի կոչում նվաճեցին Արթուր Սիմոնյանը՝ 42 կգ, Ալբերտ Վարդանյանը՝ 46, Գեւորգ Ղարիբյանը՝ 50, Կարեն Ասլանյանը՝ 54, Խաչիկ Կարապետյանը՝ 58, Արմեն Հակոբյանը՝ 63, Սարգիս Քոչարյանը՝ 69, Զորի Մելիքյանը՝ 76, Կարեն Աբգարյանը՝ 85 եւ Անդրանիկ Մարգարյանը՝ 100:
Առաջնության արդյունքներով կազմավորվեց այդ տարիքային խմբի հանրապետության հավաքականը, որն ապրիլի 26-30-ը Դոնի Ռոստովում կմասնակցի Սամուրգաշեւ եղբայրների մրցանակների խաղարկության միջազգային մրցաշարին, այնուհետեւ Հայաստանում կազմակերպվելիք ուսումնամարզական հավաքներում կնախապատրաստվի օգոստոսի 9-14-ը Վարշավայում կայանալիք այս տարիքային խմբի Եվրոպայի առաջնությանը: