Էլեն Գրիգորյանի երեք արծաթե մեդալները

Երեկ ծանրամարտի Եվրոպայի առաջնության երկրորդ օրը Հայաստանի կանանց ազգային հավաքականի անդամ Էլեն Գրիգորյանը գերազանց մրցելույթ ունեցավ՝ զիջելով միայն աշխարհի առաջնության արծաթե մեդալակիր ու Եվրոպայի կրկնակի չեմպիոն, Թուրքիայի ներկայացուցիչ Այլին Դաշդելենին: 23-ամյա հայ մարզուհին մինչեւ 53 կգ քաշային կարգում նվաճեց միանգամից երեք արծաթե մեդալ՝ բարձրացնելով այսօրվա դրությամբ իր հնարավորությունների ներած առավելագույն կիլոգրամներ:

Պոկում վարժությունն սկսելով 82 կիլոգրամից, այնուհետեւ Էլենը գլխավերեւում պահեց նաեւ 85 կիլոգրամը, սակայն երրորդ մոտեցումն 88 կգ-ին անհաջող ստացվեց: Այդուհանդերձ, այդ արդյունքն էլ լիովին բավարարեց փոքր արծաթը նվաճելու համար: Իսկ 90 կգ-ով առաջին ճանաչվեց Դաշդելենը:

Հրում վարժությունում էլ պայքարն ընթացավ հենց այս երկու մարզուհիների միջեւ: Էլենը կատարեց երեք հաջող մոտեցում՝ 103, 106 եւ 110 կիլոգրամներին, որին Դաշդելենը պատասխանեց 110 եւ 112 կիլոգրամներով՝ երրորդ անգամ նվաճելով Եվրոպայի չեմպիոնի կոչումը: Թուրք մարզուհին վերջին մոտեցմամբ փորձեց մեկ կիլոգրամով գերազանցել հրում վարժությունում իրեն իսկ պատկանող Եվրոպայի ռեկորդը, սակայն 122 կիլոգրամանոց ծանրաձողը չենթարկվեց նրա կամքին:

Երկամարտում Այլին Դաշդելենը 202 կգ-ով կանգնեց պատվո պատվանդանի առաջին աստիճանին, Էլեն Գրիգորյանը 195 կգ-ով առաջին անգամ դարձավ Եվրոպայի մեծահասակների փոխչեմպիոն, իսկ երրորդ տեղը գրավեց գերմանուհի Յուլիա Ռոդեն՝ 187 կգ: