Ապրիլի 24-ին Թուրքիայի մի քանի քաղաքներում՝ Անկարայում, Ստամբուլում, Դիարբեքիրում եւ այլուր կկազմակերպվեն Ցեղասպանության զոհերի հիշատակը հարգելու միջոցառումներ: Երեկ Ստամբուլում այս մասին տեղեկացրեց ակցիայի կազմակերպիչներից՝ «Ենի Շաֆակ» օրաթերթի մեկնաբան Ալի Բայրամօղլուն: Հիշատակի միջոցառումները կազմակերպում է «Ասենք ոչ՝ ռասիզմին եւ ազգայնամոլությանը» շարժումը: Թուրք մտավորականներն այս օրերին հայտարարում են, թե հինգ կամ տասը տարի առաջ չէին կարող պատկերացնել, որ մարդիկ այդ օրը դուրս կգան փողոց՝ հարգելու զոհերի հիշատակը, եւ թուրք հասարակությունը դանդաղորեն փոփոխվում է, մամուլն էլ գրում է այդ մասին: Ա. Բայրամօղլուն ասաց, որ օրերս «Ենի Շաֆակ» թերթը տեղեկացրել է այդ մասին եւ նույնիսկ հրապարակման մեջ օգտագործել ցեղասպանություն տերմինը: «Առավոտի» դիտարկմանը, թե արդյոք թուրք մտավորականների՝ ներելու մասին հայտարարությունների նպատակն իրականում եվրոպական կառույցներին ապացուցելը չէ՞, որ Թուրքիան դառնում է ավելի ժողովրդավար, Ա. Բայրամօղլուն այսպես արձագանքեց. «Տեղյակ եմ այդ քննադատությանը, բայց ինքներս համաձայն չենք դրա հետ: Ես ինքս օգտագործում եմ ցեղասպանություն բառը: Սրանից ավելի այժմ ոչինչ չենք կարող անել»: