Նոյեմբերյանում 40 աստիճան շոգ է, սակայն քաղաքի բնակիչները խմելու ջուր են ստանում 2-3 օրը մեկ, այն էլ՝ 1-1,5 ժամ տեւողությամբ: Ջուրը տրվում է անկանոն ժամանակացույցով, մեկ՝ երեկոյան, մեկ էլ՝ վաղ առավոտյան: Բնակիչներին մնում է կռահել «ջրի ժամը» կամ էլ նստել տանը եւ նայել ծորակին: Վերջին տարիներին Նոյեմբերյանի խմելու ջրի մատակարարման բարելավման համար մեծ ծավալի ֆինանսական ներդրումներ են կատարվել, սակայն ամեն ամառ բնակիչները կանգնում են նույն «կոտրած տաշտակի» առաջ: Պարզվում է, որ խափանվել են Բերդավանի ջրակայանի պոմպերը:
