Արդեն 2 օր է, մոտ 200 կրպակատերեր բողոքի ակցիա են կազմակերպում՝ իրենց կրպակներն ապամոնտաժելու դեմ: Երեկ էլ ակցիան շարունակվեց կառավարության շենքի դիմաց: Նրանք կառավարությունից պահանջում էին, որպեսզի պարտադրվի քաղաքապետարանին՝ դադարեցնել կրպակների ապամոնտաժումը:
Երեկ կառավարության նիստի ժամանակ ՀՀ վարչապետ Տիգրան Սարգսյանը քաղաքապետ Կարեն Կարապետյանից այս առնչությամբ պարզաբանում է պահանջել, ինչին քաղաքապետը պատասխանել է. «Չեմ կարծում, որ կենտրոնական փողոցներում կրպակատերերի մեջ խեղճ մարդիկ կան: Ժամկետ կար, նրանք այդ ժամկետի մեջ իրենց բիզնեսը պետք է անեին, տեղավորվեին, մենք պարտավորություն չունենք այլընտրանք տալ կամ փոխհատուցում: Ինչ վերաբերում է այնտեղ աշխատող եւ սոցիալապես անապահով մարդկանց, հստակ հանձնարարական կա վարչական շրջանների ղեկավարներին, այն է՝ յուրաքանչյուրի հետ անհատական աշխատանք կատարել՝ կամ աշխատատեղ տրամադրելով, կամ ֆինանսական փոխհատուցում»:
