![\"\"](\"https://www.aravot.am/2011/aravot_arm/August/20/p1.jpg\")
Ժամանակին Հայոց համազգային շարժման վարչությունը գլխավորած արդեն երկրորդ քաղաքական գործիչը հեռացավ ՀՀՇ-ից: 2000-2002-ին ՀՀՇ վարչության նախագահ Ալեքսանդր Արզումանյանը օգոստոսի 17-ին դիմում է գրել կուսակցությունից դուրս գալու մասին: «Դա արդեն իրողություն էր 1 տարուց ավելի, ես բազմիցս հայտարարել եմ: ՀՀՇ-ի վերջին համագումարին, որը տեղի է ունեցել 2010 թվականի հուլիսի 17-ին, չեմ մասնակցել: Դրանից հետո նորընտիր վարչությունը անցկացրել է անդամների վերահաշվառում, որին չեմ մասնակցել եւ դրանով իսկ համարել եմ իմ անդամակցությունը ՀՀՇ-ին դադարեցված,- «Ազատություն» ռ/կ-ին ասել է Արզումանյանը:- Ուղղակի կա ներկուսակցական ընթացակարգ, եւ եղան տարբեր մեկնաբանություններ, որ դիմում չի եղել ֆորմալացնելու համար: Ես դիմում եմ ներկայացրել, որով վերահաստատել եմ, որ 2010 թվականի հուլիսի 17-ից չեմ հանդիսանում ՀՀՇ անդամ»: Նա նաեւ նշել է, որ նոր ձեւավորված «Ազատ դեմոկրատներ» կուսակցության «համակիրն ու համախոհն է»:
