Հայաստանի հեծանվային սպորտի ֆեդերացիան շարունակում է նոր էջ գրել մարզաձեւի պատմության մեջ: Մոսկվայում ընթացող աշխարհի երիտասարդական առաջնության վերջին օրը մեր հանրապետության միակ ներկայացուցիչը՝ ՕՀՄՄ սան, Ֆիզիկական կուլտուրայի հայկական պետական ինստիտուտի ուսանող Մհեր Մկրտչյանը, «սկրեչ» մրցաձեւում նվաճած իր արծաթե մեդալին ավելացրեց եւս մեկը. այս անգամ՝ 24 կմ (12 միջանկյալ վերջնագծով) խմբային մրցավազքում: Շնորհաշատ հեծանվորդը, որակավորման փուլը հաղթահարելով, արդեն եզրափակչում 27 մասնակիցների պայքարում եզրագիծը հատեց երկրորդը՝ իր անվան դիմաց գրանցելով 36 միավոր: Սա ընդամենը մեկ միավորով է պակաս հաղթող ճանաչված գերմանացի մրցակցի արդյունքից:
Ինչպես երեկ «Առավոտի» հետ զրույցում նշեց ֆեդերացիայի փոխնախագահ Ալբերտ Սոլոյանը, սա Հայաստանի հեծանվասպորտի պատմության մեջ Մհերի՝ նախադեպը չունեցող երկրորդ նվաճումն է աշխարհի առաջնությունների անհատական մրցումներում:
