ՆՈՐ ՄԵԴԱԼՆԵՐԻ ԱԿՆԿԱԼԻՔՆԵՐՈՎ

Երեկ Լեհաստանի Սյեշանով քաղաքում մեկնարկեց ծանրամարտի Եվրոպայի պատանիների 9-րդ առաջնությունը, որին մասնակցում են 32 երկրների 197 մարզիկներ (72 աղջիկ եւ 125 տղա):
Հայաստանից Սյեշանովի մրցահարթակ կմտնեն ինը ծանրորդներ. աղջիկների պայքարում միայն 53 կգ քաշային Իզաբելա Յայլյանը, տղաների մրցաշարում՝ Հարություն Կադիմյանը (62 կգ), Վարդան Միլիտոսյանը եւ Անդրանիկ Կարապետյանը (երկուսն էլ՝ 69 կգ), Ռազմիկ Օլթեցյանը (77), Միքայել Միքայելյանը (85), Մհեր Պողոսյանը եւ Վազգեն Քոչարյանը (երկուսն էլ՝ 94), Գոռ Մինասյանը (94+):
Դատելով Եվրոպայի առաջնության պաշտոնական կայքէջում տպագրված մեր մարզիկների ներկայացրած նախնական հայտերից, ակնկալվում է, որ նրանք այս անգամ էլ կարող են պայքարել մեդալների համար: Այսօր Հայաստանի պատվիրակներից առաջինը պայքարի մեջ ներգրավվելու են Իզաբելա Յայլյանը եւ Հարություն Կադիմյանը: Տեղեկացնենք, որ Իզաբելայի հայտարարած երկամարտի 165 կիլոգրամ նախնական պատվերը ամենաբարձրն է 53 կգ քաշային աղջիկների պայքարում: