Հայաստանում դաբաղի դեպքեր չկան, իսկ Ճամբարակի շրջանի որոշ գյուղերում գրանցված խոշոր եղջերավոր անասունների անկումների պատճառները այլ հիվանդությունների արդյունք են: Այս մասին երեկ լրագրողների հետ հանդիպմանը վստահեցրել է գյուղատնտեսության փոխնախարար Գրիշա Բաղիյանը: Նրա խոսքերով՝ «Գետիկ գյուղում անկումը պայմանավորված է արյան պարազիտային հիվանդությամբ, իսկ Վահան գյուղում` էմգար հիվանդությամբ»: Ըստ tert.am-ի, Գ. Բաղիյանը վստահեցրել է, որ կաթի եւ մսամթերքի թանկացումներն էլ պայմանավորված են համաշխարհային շուկայում գների փոփոխությամբ: Համաշխարհային շուկայում կաթի գինն աճել է 20%-ով, Հայաստանում՝ 7,8%-ով, մսի գնի աճը միջազգային շուկայում 15% է եղել, մեզ մոտ՝ 11%: Օգոստոսին, ըստ Գ. Բաղիյանի՝ Հայաստանում խոզի մսի գինն իջել է 200 դրամով, գառան մսինը՝ 100:
Փոխնախարարը նաեւ հավաստիացրել է, որ իրականությանը չի համապատասխանում վրացական լրատվամիջոցների այն տեղեկատվությունը, ըստ որի՝ գառները Հայաստանից տարվում են Վրաստան, որտեղից էլ ինքնաթիռով արտահանվում են այլ երկրներ: