Քաղաքապետարանի Առեւտրի եւ սպասարկումների վարչության պետի զեկույցի համաձայն՝ մայրաքաղաքի տարբեր վարչական շրջաններում գույքագրվել է ժամանակավոր շինություններում տեղակայված շուրջ 2. 240 առեւտրի սպասարկման օբյեկտ։ Կազմված ժամանակացույցի համաձայն՝ շարունակվում են կենտրոնական փողոցներում տեղակայված չգործող եւ պայմանագրային ժամկետներն ավարտված կրպակների ապամոնտաժման աշխատանքները։ Քաղաքապետ Կարեն Կարապետյանը հանձնարարել է խստորեն հետեւել գործընթացի օրենքի սահմաններում իրականացմանը, իսկ ապամոնտաժվող կրպակների սոցիալապես անապահով աշխատակիցներին այլընտրանքային աշխատատեղեր առաջարկել։
Այս մասին հայտնում են քաղաքապետարանի լրատվական ծառայությունից: Ըստ նույն աղբյուրի, երեկ քաղաքապետարանում տեղի ունեցած հերթական աշխատանքային խորհրդակցության ժամանակ Կ. Կարապետյանը սեպտեմբերի 3-ը, 10-ը եւ 17 -ը հայտարարել է համաքաղաքային շաբաթօրյակի օրեր։ Նա հանձնարարել է մաքրման ու բարեկարգման աշխատանքներում ներգրավել պետական եւ հասարակական կազմակերպություններին, բիզնես կառույցներին, առողջապահական, մշակույթի եւ ուսումնական հաստատություններին, համատիրություններին։
