Որպես լրագրող աշխատավարձ եմ ստանում 1990-ից: Չօգտագործեցի «լրագրությամբ զբաղվում եմ» արտահայտությունը, քանի որ դա անում եմ 5-րդ դասարանից: Այնպես որ, կարող եք հաշվարկել, թե քանի տարի է, որ խիստ ավանդական լրագրող էի:
Բայց համացանցը փոխեց ամեն ինչ: Երկու տարի առաջ պատկերացնել անգամ չէի կարող, որ տպագիր հրապարակումներս լայն արձագանք կստանան գրեթե միայն այնժամ, եթե նրանք տարածվեն նաեւ համացանցում:
Եվ ահա` այս ահռելի փոփոխություններն անդրադարձ ունեցան նաեւ իմ գործունեության վրա: Ես դարձա առցանց «Առավոտի» խմբագիր:
Ես այլեւս չեմ վազում ասուլիսների, չեմ մտածում, թե ինչ մի հետաքրքիր հարց տամ զրուցակցիս, որը, գլխավոր խմբագրիս բնորոշմամբ, դեռ պետք է նաեւ «էքսքլյուզիվ անձնավորություն» լինի: Դեռ չեմ հասցրել կարոտել այդ վիճակներին: Գուցե դեռ կհասցնեմ:
Սա իրապես նոր բնույթի աշխատանք է ինձ համար: Այս գործից էլ դեռ ամեն ինչ չէ, որ հասկանում եմ: Ու զանազան հիմար հարցեր եմ տալիս մեր համակարգային ադմինիստրատորին:
Տեսնենք, թե ինչ կստացվի:
Համենայնդեպս` միշտ պատրաստ եմ լսել Ձեր դիտողությունները: Եվ սա միայն հավուր պատշաճի ասված խոսք չէ:
