Իրանի իշխանություններն ազատ են արձակել Մարզիե Վաֆամեհրին, որը դեռ հուլիսին դատապարտվել էր մտրակի 90 հարվածի եւ մեկ տարվա բանտարկության` «Իմ վաճառքի հանված Թեհրանը»( My Tehran for Sale) ավստրալական ֆիլմում նկարահանվելու համար: Ֆիլմը ցուցադրվել էր կանանց իրավունքների պաշտպանությանը նվիրված միջազգային կինոփառատոնի շրջանակներում:
Վաֆամեհրը կալանավորվել էր այս տարվա հուլիսին, երբ ֆիլմի կրկնօրինակներն անօրինական ճանապարհով (դրա ցուցադրությանը Թեհրանը հավանություն չէր տվել) հայտնվել էին Իրանում: Ֆիլմը պատմում է Թեհրանում մի երիտասարդ դերասանուհու կյանքի մասին, որի թատերական գործունեությունն իշխանությունների կողմից արգելված է, եւ նա ստիպված է գաղտնի եւ երկակի կյանք վարել: Ֆիլմի տեսարաններից մեկում դերասանուհին հայտնվել է առանց իրանական ավանդական գլխաշորի, մեկ այլ դրվագում՝ նա ալկոհոլային խմիչք է խմում, ինչը հակասում է իրանական ավանդույթներին ու օրենքներին:
Դերասանուհին, իշխանություններին վարկաբեկելու մեղադրանքով, դատապարտվել էր մեկ տարվա ազատազրկման եւ գանահարման: Նրա փաստաբանը կայացված դատավճիռը բողոքարկել էր վերադաս ատյանի դատարանում: Իրավապաշտպանների մատուցմամբ, Մարզիե Վաֆամեհրն ազատ է արձակվել դեռ երկուշաբթի օրը` այն բանից հետո, երբ Թեհրանի Վերաքննիչ դատարանը նրա ազատազրկման ժամկետը կրճատել էր` նրան դատապարտելով եռամսյա ազատազրկման եւ չեղյալ էր համարել մտրակահարումը:
Ի դեպ, Վաֆամեհրն իրանական կինոմատոգրաֆիայի` վերջին շրջանում դատապարտված միակ ներկայացուցիչը չէ:
