Լոնդոնում եկող տարի մեկնարկող ամառային օլիմպիական խաղերի մեդալներն արդեն պատմության մեջ են մտել որպես օլիմպիական խաղերի պատմության մեջ ամենածանր պարգեւներ: Դրանցից յուրաքանչյուրը կշռում է 400 գրամ: Այնպես որ, մրցանակակիր դառնալու ցանկություն ունեցող մարզիկները պետք է այդքան ծանր «բեռը» սեփական վզին կրելուն պատրաստ լինեն:
Բայց քանի որ այսօր աշխարհում ֆինանսական ճգնաժամ է եւ համաշխարհային բորսաներում ոսկու գինը խիստ տատանումներ է տալիս, օլիմպիական խաղերի կազմակերպիչները որոշել են խաղեր տալ թանկարժեք մետաղների շուկայում: Պարզվում է, որ ոսկե մեդալի 92,5 տոկոսը արծաթ է լինելու, իսկ ոսկին՝ ոչ ավելի, քան 6 գրամ (1,34 %): Այնպես որ, դեղին գույն ունեցող ամեն մետաղ չէ, որ ոսկի է, թեեւ մարզիկների եւ մարզիչների համար թանկարժեք մետաղների տոկոսները տվյալ պարագայում նշանակություն չունեն: Օլիմպիական չեմպիոն տիտղոսը ցմահ փառք է:
Աշոտ Հակոբյան
