Այսօր ինքնասպանություն է տեղի ունեցել Երեւանում: Ինչպես դեպքի վայրից Aravot.am-ին հայտնում է ֆոտոլրագրող Գագիկ Շամշյանը, ժամը 09.30-ի սահմաններում Քանաքեռ-Զեյթուն վարչական շրջանի Ռուբինյանց 17 շենքից, ըստ նախնական տեղեկությունների՝ ինքնասպանության նպատակով իրեն ցած է նետել մի կին:
Դեպքի վայր են ժամանել 1-03 ծառայության աշխատակիցները, բայց քանի որ կինն արդեն մահացած է եղել՝ կատարվածի մասին տեղեկացրել են Քանաքեռ-Զեյթունի ոստիկանության բաժին: Այդ բաժնի օպերատիվ-քննչական խումբն արդեն ժամանել է դեպքի վայր՝ Քանաքեռ-Զեյթուն ոստիկանության բաժնի պետ պրն Գրիգորյանի գլխավորությամբ:
Քննիչները կնոջ գրպանում հայտնաբերել են մի գրություն, որտեղ նշված էր տան հասցե եւ հեռախոսահամար: Ոստիկանության աշխատակիցները զանգահարելով տվյալ հեռախոսահամարով՝ պարզել են, որ այդ կինը բնակվում է Դեկաբրիստների փողոցում: Արդեն ժամանել է այդ կնոջ՝ 1938թ-ին ծնված Մարուս Բոչոլյանի որդին:
Ժամանել է դատաբժիշկը, եւ զննումից հետո դիակը կտեղափոխվի դիահերձարան:
Կարդացեք նաև
Ռուբինյանց 17-ում բնակվողները ֆոտոլրագրողին պատմում էին, որ այս շենքն իրենք արդեն անվանում են «մահապարտների շենք», քանի որ վերջին 2-3 տարվա ընթացքում այդ շենքից ինքնասպանություն է գործել արդեն 5 քաղաքացի: Եվ նրանցից որեւէ մեկը չի եղել այդ շենքի բնակիչ:
Լուսանկարները եւ տեսանյութը՝ Գագիկ Շամշյանի
