Այսօր «Հենարան» ակումբում կայացավ «Նարեկացի» արվեստի միության հիմնադիր նախագահ Նարեկ Հարթունյանի կալանավորման թեմայով ասուլիս, որին մասնակցեցին փաստաբաններ Լեռնիկ Հովհաննիսյանը, Անի Թորոսյանը, Արթուր Չաքմիշյանը եւ «Նարեկացի» արվեստի միության ադմինիստրատիվ ղեկավար Րաֆֆի Մովսիսյանը: Նարեկ Հարթունյանի փաստաբան Լեռնիկ Հովհաննիսյանի խոսքով, քանի որ Նարեկ Հարթունյանը Ժամացույցի գործարանի 35 %-ի բաժնետեր է ու մեկ տարի առաջ պետք է բաժնետոմսերի վաճառքի գործարք կնքեր, սակայն ինչ-ինչ պատճառներով գործը վերջ չունեցավ, նրան անհիմն մեղադրանք առաջադրելով՝ օրերս ձերբակալեցին: Ըստ փաստաբան Արթուր Չաքմիշյանի էլ. «Նարեկը օրենքի սահմաններում պարզապես բողոքարկել է վերստուգման արդյունքները՝ իր ընկերությունում: Նարեկը իրեն պատկանող «Ջի, Էյջ սթորի էնթերփրայզիս» ընկերությունում խախտումներ էր գտել եւ մոտ 10 օր առաջ դիմել վարչական դատարան: Գործը վարույթ է ընդունվել, բայց այդ մարդուն այլ գործով մեղադրանք է առաջադրվել»:
Փաստաբանները հավելեցին, որ բացի Նարեկ Հարթունյանից, ձերբակալվել են նաեւ ընկերության փոխտնօրեն Անի Մնացականյանն ու հաշվապահ Արթուր Գալստյանը:
Հիշեցնենք, որ դեկտեմբերի 9-ի ուշ երեկոյան, Նարեկ Հարթունյանը ձերբակալվել է 2009 թվականից 111 միլիոն դրամի հարկային խախտումներ կատարելու մեղադրանքով:
Նրա մյուս փաստաբան Անի Թորոսյանի ներկայացմամբ էլ, իր պաշտպանյալը 24 ժամ գտնվել է քննչական վարչությունում, ընդ որում, ձերբակալման համար չկային բավարար հիմքեր. «Իսկ գործը կազմվել է դեկտեմբերի 10-ով, նրա համար, որ 12-ն անց է եղել: Այս ամենը կազմակերպված էր կոնկրետ Նարեկի դեմ, որը «Ջի, Էյջ սթորի էնթերփրայզիս» ընկերության ղեկավարումը ստանձնել է 2010-ի սեպտեմբերից: Դրանից առաջ այդ պաշտոնում եղած ոչ Արտյոմ Մարտիրոսյանին, ոչ էլ փաստացի ղեկավարումն իրականացնող Սեւակ Արծրունուն, մեղադրանք չի առաջադրվել, նրանք միայն վկա են, ինչը շատ հարցեր է առաջացնում»:
Կարդացեք նաև
Անի Թորոսյանի խոսքերով, Նարեկ Հարթունյանը, երբ ստանձնել է «Ջի, Էյջ սթորի էնթերփրայզիսի» ղեկավարի պաշտոնը, աուդիտորական ստուգում է անցկացրել, որի համաձայն, ընկերության դրամարկղից գումար էր պակասում: Փաստաբանի հավաստմամբ, Նարեկ Հարթունյանը պարզել էր, որ նախկին տնօրեն Սեւակ Արծրունին ընկերության գումարներով մեքենա է գնել. «Այս եւ այլ փաստեր ուղարկվել են գլխավոր դատախազություն, բայց սառեցվել են: Սեւակը եղել է շատ սիրված եւ մոտ անձ, ու նրան վստահվել է ամեն ինչ՝ բիզնեսի, ընկերության կառավարման առումով: Ամբողջ պատմությունը սկսվել է նրանից, երբ Նարեկը վերացրել է այդ լիազորագիրը»: Ա. Թորոսյանը ավելացրեց, որ այսօր այցելելու են Նարեկին, տեսնելու համար, թե ինչ պայմաններում են պահում նրան:
«Նարեկացի» միության ադմինիստրատիվ ղեկավար Րաֆֆի Մովսիսյանն էլ ասուլիսի ավարտին փաստեց, որ Նարեկ Հարթունյանը անգամ վարչապետից է «մեդալ» ստացել, մինչդեռ այսօր բանտում է:
Անուշ ԽԵՉՈՅԱՆ
