Էներգետիկայի եւ բնական պաշարների նախարար Արմեն Մովսիսյանն անդրադառնալով վերջին օրերին բնապահպանների կողմից մեծ աղմուկ բարձրացրած Քաջարան գյուղի մոտակայքում շահագործվելիք հանքին, ասաց. «Վարչապետի որոշումով ստեղծվել էր միջգերատեսչական աշխատանքային խումբ, որը մեկնել է տեղում ուսումնասիրելու այդ խնդիրները, նրանք արդեն վերադարձել են եւ պատրաստվում են համապատասխան առաջարկությունը ներկայացնել կառավարություն: Այդ առաջարկությունների հիման վրա կբանակցենք Քաջարանի կոմբինատի սեփականատերերի հետ հարցի հրատապության խնդիրը որոշելու եւ համապատասխան լուծումներ գտնելու»:
Հարցին, թե այնուամենայնիվ ի՞նչ է սպասվում Քաջարանի գյուղացիներին եւ արդյոք, ի վերջո, կորոշվի հանքը շահագործե՞լ, պարոն Մովսիսյանն ասաց. «Նախ պետք է հասկանանք ինչ պետք է անենք, բնականաբար, եթե ինչ-որ վտանգ ներկայացնի, հո չե՞նք գնալու դրան, այսինքն՝ պետք է նախ գնահատենք ինչքանով է դա վտանգավոր եւ ինչքանով վտանգավոր չէ, ինչքանով է դեմ բնապահպանական նորմերին, ինչքանով դեմ չէ, նոր միայն կորոշենք»:
Լուսինե ԲՈՒԴԱՂՅԱՆ
