ՀԱՅՏԱՐԱՐՈՒԹՅՈՒՆ
Մարդու իրավունքների միջազգային ֆեդերացիան և իր անդամ կազմակերպություն Քաղաքացիական հասարակության ինստիտուտը դատապարտում են «Եհովայի վկաներ» կրոնական կազմակերպության անդամ Անդրանիկ Մակվեցյանի 6 ամիս ժամկետով ազատազրկումը։
Նոյեմբերի 28-ին Երևան քաղաքի Մալաթիա-Սեբաստիա վարչական շրջանի ընդհանուր իրավասության դատարանը (դատավոր Տիգրան Պետրոսյան) վճռեց Անդրանիկ Մակվեցյանին մեղավոր ճանաչել ՀՀ քրեական օրենսգրքի 143-րդ հոդվածի 1-ին մասով նախատեսված արարք կատարելու համար (քաղաքացիների իրավահավասարությունը խախտելը)։
2011 թ. մայիսի 15-ին «Յեհովայի վկաներ» կրոնական կազմակերպության անդամներ Անդրանիկ Մակվեցյանն ու Սամվել Գրիգորյանը քարոզում էին Երևանի Սուրբ Երրորդություն եկեղեցու մոտակայքում։ Տեր Եսայի քահանա Արտակ Արթենյանը մոտեցել է նրանց և պահանջել է հեռանալ եկեղեցու մոտակա տարածքից։ Արդյունքում ծավալվել է վիճաբանություն քահանայի և Անդրանիկ Մակվեցյանի միջև։
Կարդացեք նաև
Մայիսի 17-ին քրեական գործ է հարուցվել և Անդրանիկ Մակվեցյանի նկատմամբ մեղադրանք է առաջադրվել ՀՀ քրեական օրենսգրքի 118 հոդվածով (ծեծը), 322 հոդվածի առաջին մասով (ինքնիրավչությունը) և 137 հոդվածի առաջին մասով (սպանության, առողջությանը ծանր վնաս պատճառելու կամ գույք ոչնչացնելու սպառնալիքը): Սակայն մեղադրողը հոկտեմբերի 21-ին փոփոխել է մեղադրանքի ծավալը և ավելացրել ևս մեկ մեղադրանք՝ ՝ ՀՀ քրեական օրենսգրքի 143-րդ հոդվածի 1-ին մասով: Դատարանը մեղավոր ճանաչեց Անդրանիկ Մակվեցյանին ՀՀ քր. օր. 143-րդ հոդվածի 1-ին մասով։
Ըստ դատավճռի՝ Անդրանիկ Մակվեցյանն իր գործողություններով խախտել է ՀՀ սահմանադրության 8.1. (պետություն-եկեղեցի հարաբերություններ) և 14.1 (քաղաքացիների իրավահավասարությունը) հոդվածներում ամրագրված իրավունքները և ազատությունները։ Դատարանը իր վճռում նշել է. «Անդրանիկ Մակվեցյանը խախտել է տուժող Տեր Եսայի քահանա Արթենյանի’ եկեղեցու և նրա շրջակա տարածքում քարոզչություն կատարելու, անձանց Եհովայի վկաներ կրոնական կազմակերպության մեջ ներգրավվելու փորձ կատարելու գործողությունները կանխելու նրա իրավունքը: Այսինքն’ Անդրանիկ Մակվեցյանի արարքում առկա են ՀՀ քրեական օրենսգրքի 143-րդ հոդվածի 1-ին մասով նախատեսված հանցագործության հատկանիշներ»։
Մեր կազմակերպությունները գտնում են, որ Սահմանադրության 8.1 և 14.1 հոդվածները կիրառելի չեն գործի փաստերի նկատմամբ։ Ավելին, ՀՀ Սահմանադրության 8.1 հոդվածը կարգավորում է պետություն – եկեղեցի հարաբերությունները, չի նախատեսում որևէ անհատական իրավունք և, հետևաբար, չի կարող խախտվել անհատի կողմից։
Մեր կազմակերպությունները համոզված են, որ Անդրանիկ Մակվեցյանի նկատմամբ կայացված դատավճիռը պայմանավորված է նրա՝ «Եհովայի վկաներ» կրոնական կազմակերպությանը պատկանելու հանգամանքով։
Այս դատավճիռը հանդիսանում է ՀՀ Սահմանադրության 26-րդ և Մարդու իրավունքների եվրոպական կոնվենցիայի 9-րդ հոդվածներով սահմանված իրավունքների խախտում:
FIDH-ը և ՔՀԻ-ն կոչ ենք անում ՀՀ իշխանություններին՝
- անհապաղ ազատ արձակել Անդրանիկ Մակվեցյանին,
- ապահովել բոլոր կրոնական կազմակերպությունների և նրանց անդամների՝ իրենց դավանանքն ազատ քարոզելու իրավունքի իրացումը ՀՀ սահմանադրության 26-րդ հոդվածին համապատասխան,
- ապահովել կրոնի ազատությանն առնչվող դատական գործերի անկախ և անաչառ քննությունը,
- կրոնի ազատության հարցերում պահպանել չեզոքություն և նպաստել հասարակությունում և կրոնական կազմակերպությունների միջև հարաբերություններում հանդուրժողականության ամրապնդմանը
