Դերենիկ Մալխասյանը` մեջտեղում, դեմ է «մերսիներին»:
Այսօր «Սիվիլիտաս» հիմնադրամը Գյումրիում քննարկումներ էր կազմակերպել քաղաքական ու տնտեսական հարցերի շուրջ, օրինակ` ի՞նչ անել, որ Գյումրին փրկվի, կյանքը մայրաքաղաքից մարզեր տեղափովի և այլն:
Հիմնադրամի փորձագետ Թաթուլ Հակոբյանը բանախոսներից նաև կարծիք հարցրեց հայ-թուրքական հարաբերությունների ընթացքի ու երեկ Ֆրանսիայի Սենատում Ցեղասպանության ժխտումը քրեականացնելու մասին օրինագծի ընդունման մասին:
«Շիրակ կենտրոն» հ/կ-ի նախագահ Վահան Թումասյանը այն համոզմանն էր, որ թուրքերը ճկուն են և ֆրանսիացիներից այսպիսի ապտակ ստանալուց հետո` կփորձեն շփման ճանապարհներ գտնել, մինչդեռ «ԳԱԼԱ» հեռուստաընկերության քաղաքական մեկնաբան Դերենիկ Մալխասյանը զարմացավ այն մարդկանց վրա, ովքեր հրճվանքով են խոսում այս մասին: «Պետք է սա ընդունել որպես պարտավորություն , չարժե էդքան մեծ ուրախությամբ ֆրանսիացիներին շնորհակալություն հայտնել ու համազգային տոնախմբություն սարքել ցեղասպանության ընդունումը, սա ստրկական հոգեբանություն է, հերիք է «մերսիներ» ասենք: Ֆրանսիան ոչ թե լավություն է արել, այլ սա արել է` ելնելով իր քաղաքական շահերից, շուտ պիտի աներ` հարյուր տարի առաջ, եթե շահը չի խոսում, ինչո՞ւ հենց հիմա ընդունեց, ինչո՞ւ չարեց 20 կամ 50 տարի առաջ: Ազգային արժանապատվությունը չարժե կորցնել»,-կարծիք հայտնեց Դերենիկ Մալխասյանը:
Նունե ԱՐԵՎՇԱՏՅԱՆ
