Եկող շաբաթվանից կրթության, մշակույթի եւ սոցիալական պաշտպանության ոլորտի քաղաքացիական եւ պետական 120 հազար ծառայողներ կունենան սոցիալական փաթեթներ. այս մասին այսօր ասաց Ֆինանսների նախարար Վաչե Գաբրիելյանը:
Փաթեթը ներառում է բժշկական ապահովագրություն, հիպոթեքային վարկի ամսական վճարի մարում, կրթության նախարարության կողմից հաստատված ուսումնական ծրագրերով ուսման վճար, ինչպես նաև փաթեթից օգտվողների հանգստի կազմակերպում ՀՀ-ում և ԼՂՀ-ում: Բժշկական ապահովագրության տրամադրումն էլ ենթադրում է տարին մեկ անգամվա պրոֆիլակտիկ զննում:
Նախարարի խոսքերով՝ բժշկական ապահովագրության համար սահմանված բազային գումարը 52 հազար դրամ է, սակայն մեկ տարվա ընթացքում շահառուները կարող են ստանալ 3 մլն 800 հազար դրամի բժշկական ծառայություն: Այդ գումարի շրջանակում ապահովագրական ընկերությունները պետք է փոխհատուցեն բժշկական սովորական խորհրդատվությունից մինչեւ սրտի վիրահատության ծախսերը:
Կադրերի ռեզերվում գտնվող անձանց, տվյալ մարմնում վեց ամսից պակաս աշխատանքային ստաժ ունեցող աշխատակիցների, կես դրույքից պակաս ծանրաբեռնվածությամբ անձանց, ինչպես նաև բարձրաստիճան պաշտոնատար անձանց և տեխնիկական սպասարկում իրականացնող անձանց վրա այս փաթեթը չի տարածվում:
Կարդացեք նաև
Եթե աշխատակիցը ձեռք է բերել ապահովագրության սետիֆիկատ, բայց մի քանի ամիս հետո դուրս է եկել աշխատանքից, ըստ նախարարի, սերտիֆիկատը չպիտի վերադարձնի:
Վաչե Գաբրիելյանի խոսքերով, այս սոցիալական փաթեթներից կարող են օգտվել նաեւ շահառուի ընտանիքի անդամները, բայց ինչպես նախարարն ասաց, դա չի վերաբերում տատիկ-պապիկներին, հորքուր-մորքուրներին: Այսինքն՝ փաթեթ ունեցողի կինը կամ ամուսինը եւ մինչեւ 27 տարեկան չամուսնացած երեխաները:
Նելլի ԲԱԲԱՅԱՆ