Առաջիկայում Հայաստանի քաղաքացիները կունենան երկու անձնագիր, որոնցից մեկը լինելու է էլեկտրոնային: Այսօր այս մասին լրագրողների հետ զրույցում ասաց արդարադատության նախարար Հրայր Թովմասյանը՝ տեղեկացնելով, որ անձնագրերից մեկը վավեր է լինելու արտասահմանում, մյուսը՝ Հայաստանում. «Ներսում այդ անձնագրերին զուգահեռ կգործեն նաեւ նույնականացման քարտեր, դա սովորական պրակտիկա է, ամբողջ աշխարհում ընդունված է ունենալ երկու անձնագիր ու նույնականացման քարտ»:
Նախարարն ասաց, որ նոր անձնագրերը քաղաքացուն կտրվեն անվճար կամ 1000 դրամով:
Իսկ ինչ վերաբերում է նույնականացման քարտերին, դրանք քաղաքացիները կունենան հունիսի 1-ից: Դրանք նախատեսված են լինելու ոչ թե այս, այլ հաջորդ ընտրությունների համար. «Մյուս բոլոր ընտրությունների համար են նախատեսված, այդ թվում՝ նախագահական ընտրությունների համար: Դրանք բացառելու են կրկնակի քվեարկությունները եւ ուրիշ անձի կողմից քվեարկելու հնարավորությունը»:
Արփինե ՍԻՄՈՆՅԱՆ
