Ինտերնետ ընկերությունների մի խումբ, ներառյալ «Google» ընկերությունը, համաձայնել են սատարել վեբ բրաուզերներում «չհետագծել» կոճակի տեղադրումը՝ ինտերնետից օգտվողների տվյալների գաղտնիությունը պաշտպանելու նպատակով:
Ինտերնետ բրաուզերներ մշակող ընկերություններն ավելի քան մեկ տարվա ընթացքում դեմ են հանդես եկել այդ կոճակը ներկառուցելու պահանջներին: Ժամանակի ընթացքում սակայն բրաուզերներ մշակող տարբեր ընկերություններ, ներառյալ « Firefox» բրաուզերը մշակող «Mozilla», «Internet Explorer» բրաուզերը մշակող «Microsoft» և «Mountain Lion» օպերացիոն համակարգը մշակող « Apple» ընկերությունները աստիճանաբար սկսել են օգտագործել այս գործառույթը:
Աշխարհի ամենահայտնի «Google» որոնման համակարգը մշակող ընկերությունը հինգշաբթի օրը հանդես է եկել հայտարարությամբ, որի համաձայն այն միանալու է հետագծման դեմ տարվող պայքարին, որին արդեն իսկ միացել է տեխնոլոգիայի, գովազդի և լրատվության ոլորտում գործող 400 ընկերություն:
«Google» ընկերության կողմից արված հայտարարությունից մի քանի ժամ անց ԱՄՆ-ի Սպիտակ տունը դիմել է երկրի Կոնգրեսին՝ ինտերնետից օգտվողների անձնական տվյալների գաղտնիության իրավունքի մասին օրինագիծ ընդունելու կոչով:
Ինտերնետի ոլորտում գործող ընկերությունների կողմից ձեռք բերված համաձայնության պայմաններով գալիք ինն ամսվա ընթացքում նախատեսվում է աստիճանաբար դադարեցնել օգտվողների տվյալների օգտագործումը ցուցադրվող գովազդի հարմարեցման համար: Ընկերություններին սակայն դեռևս թույլատրվելու է հետագծել օգտվողների տվյալները՝ «շուկայի ուսումնասիրության» կամ «ապրանքների մշակման» ընդհանուր նպատակներով:
«Ամերիկայի ձայն»
