Այսօր «Գոլդեն Թուլիփ» հյուրանոցում մինչ ասուլիսի սկիզբը Տարածաշրջանային հետազոտությունների կենտրոնի տնօրեն Ռիչարդ Կիրակոսյանը հեգնախառն կատակով հայտարարեց, թե ինքը անդամագրվել է ԲՀԿ-ին: Ասուլիսից հետո Aravot.am-ը պարոն Կիրակոսյանից հետաքրքրվեց, թե հեգնանքը վերաբերում էր Վարդան Օսկանյանի՞ն, որը վերջերս անդամագրվել է այդ կուսակցությանը, թե՞ ԲՀԿ-ին: Ռ. Կիրակոսյանն ի պատասխան նշեց, որ ԲՀԿ-ն դարձել է Ռոբերտ Քոչարյանի ճամբարը: Այն հարցին՝ արդյոք հնարավո՞ր է համարում 2013-ի նախագահական ընտրություններին Ռ. Քոչարյանի առաջադրումը, պարոն Կիրակոսյանը պատասխանեց. «Կասկածում եմ: Բայց մի բան միանշանակ է, որ կան մարդիկ, որոնք լոյալ են Քոչարյանի հանդեպ՝ անձնական շահերից ելնելով»: Ռ. Կիրակոսյանը հետաքրքրական համարեց այն, որ ՀՀԿ-ի կողմից անընդհատ հարձակումներ են լինում ԲՀԿ-ի վրա, սակայն պատասխանը այդպես էլ չի երևում: Այնուհետև քաղաքագետը հավելեց. «Սակայն պարզ է, որ կոնֆլիկտը գնալով սրվում է»:
Տաթև ՀԱՐՈՒԹՅՈՒՆՅԱՆ
