Կենտրոնական ընտրական հանձնաժողովի տվյալներով, այսօր մեծամասնական ընտրակարգով առաջադրվել են եւս 17 թեկնածուներ: Նրանց շարքում են նաեւ անվանի գործարարներ: Թիվ 6 ընտրատարածքում «Վասանավի» ընկերության տնօրեն, ԲՀԿ-ական Վահան Կարապետյանն է թեկնածություն առաջադրել, 7-րդ ընտրատարածքում էլ՝ անկուսակցական, ԱԺ պատգամավոր Սամվել Ալեքսանյանը, իսկ 8-րդ ում՝ ՀՀԿ-ական, ԱԺ պատգամավոր Կորյուն Նահապետյանը:
Թիվ 11 ընտրատարածքում «Մուշ-Մեդա» ընկերության տնօրենների խորհրդի նախագահ, ՕԵԿ-ական Էդուարդ Մադաթյանն է, 12-ում ԲՀԿ-ական, ԱԺ պատգամավոր Լյովա Խաչատրյանը, 25-ում՝ ԲՀԿ-ական Դավիթ Քոչարյանը, թիվ 27-ում էլ արդեն առաջադրված Համլետ Հայրապետյանին միացել է ԲՀԿ-ական ԱԺ պատգամավոր Մուրադ Գուլոյանը:
Գործարարի թեկնածություն կա նաեւ թիվ 28 ընտրատարածքում. այստեղ ԲՀԿ-ական ԱԺ պատգամավոր Գագիկ Ծառուկյանն է, 29-ում՝ անկուսակցական ԱԺ պատգամավոր Արկադի Համբարձումյանը, իսկ թիվ 32-ում՝ միանգամից երկու անկուսակցական է ինքնառաջադրվել՝ Արտակ Միրզոյանն ու անհատ ձեռնարկատեր Էդուարդ Չատինյանը: 33-ում՝ ՕԵԿ-ական Աժ պատգամավոր Հովհաննես Մարգարյանն է, 35-ում՝ անկուսակցական «Գյումրի-Գարեջուր» ընկերության լաբորատորիայի վարիչ Հայկ Սուլթանյանը: 39-ում էլ կպայքարեն ՀՀԿ-ական, ԱԺ պատգամավոր Աշոտ Արսենյանն ու անկուսակցական «Վայք» ՋՕԸ գլխավոր հաշվապահ Գորկի Գրիգորյանը: Իսկ 41-ում՝ նախօրեին արդեն առաջադրված երկու թեկնածուներին այսօր ավելացել են եւս երկուսը՝ անկուսակցական «Ջիովաննի» ընկերության մատակարար Սպարտակ Հարությունյանն ու ՕԵԿ-ական Տավուշի մարզպետի տեղակալ Վահե Վարդապետյանը:
Արփինե ՍԻՄՈՆՅԱՆ
Կարդացեք նաև
