Դեռ շաբաթներ առաջ մի պատեհ առիթով ՀՀԿ խորհրդարանական խմբակցության պատգամավոր Գալուստ Սահակյանի հետ մասնավոր զրույցում վերջինս, Aravot.am-ի հարցին ի պատասխան, փորձում էր փորձագետի տեսանկյունից կանխատեսել, թե նոր գումարման ԱԺ-ում քաղաքական քանի՞ ուժ կլինի: Այն ժամանակ նա թվարկել էր 6 ուժերի` ՀՀԿ, ԲՀԿ, ՀԱԿ, ՕԵԿ, ՀՅԴ եւ «Ժառանգություն»- «Ազատ դեմոկրատներ», բայցեւ հավելել էր, թե շատ բան կախված կլինի ոչ միայն այդ ուժերի համամասնական ցուցակից, այլեւ՝ նրանց վարած քարոզարշավից:
Այսօր, երբ թվարկված ուժերից երկու-երեքի համամասնական ցուցակներն արդեն մասամբ հրապարակվել են, նույն հարցով կրկին դիմեցինք ՀՀԿ խմբակցության ղեկավարին, ու նա թվարկեց. «ՀՀԿ, ԲՀԿ, ՕԵԿ, ՀՅԴ: Այսքանը փաստացի արդեն պարզ է, որովհետեւ մնացածների մասնակցության ձեւաչափը դեռ հայտնի չի, եւ անհնար է վերլուծություններ անել»:
Մենք հիշեցրինք, որ մոտավորապես հայտնի են նաեւ ՀԱԿ-ի համամասնական ցուցակի առաջին մոտ 20 թեկնածուները, մասամբ նաեւ «Ժառանգություն-Ազատ դեմոկրատներինը», ինչին ի պատասխան Սահակյանը շարունակեց թվարկելը. «Նաեւ ՀԱԿ-ը, իսկ «Ժառանգության» ռազմավարությունը դեռ հրապարակված չի, որպեսզի կարողանանք կանխատեսել, բայց, կարծում եմ՝ եթե որոշակի լավ, ամուր կապ ունենա ազատ դեմոկրատների հետ, անցողիկ կդառնան»: Հետաքրքրվեցինք, թե ինչո՞ւ նա շեշտեց կամ «Ժառանգության» «անցողիկությունը» պայմանավորեց «Ազատ դեմոկրատներ» կուսակցության հետ. արդյոք այն պատճառով, որ վերջինս համարվում է որպես՝ արեւմտամե՞տ ուժ: «Ես չեմ հավատում «մետ» ուժերին: Ես գիտեմ, որ բոլորն այնպես են խոսում, որ հայամետ ուժեր են,մնացածը քննարկելու հարց է: Իմիջիայլոց, խոսում են նաեւ, որ ընտրություները գաղափարախոսությունների պայքար լինի: Ես կարծում եմ՝ պետք է մեկ գաղափարախոսություն լինի, մաշտոցյան ժամանակներից եկած.ամուր ազգ՝ ամուր պետություն: Մնացածը հոսանքներ են՝ ազատականներ, պահպանողականներ: Սրանք ածանցյալ են: Մենք մեկ խնդիր ունենք՝ ունենալ ամուր պետություն»:
Անդրադառնալով հիշյալ ուժերի՝ ԱԺ-ում, ենթադրաբար, ունենալիք համամասնությանը, Գալուստ Սահակյանն ասաց, թե ՀՀԿ-ն, համենայնդեպս, ետընթաց չի ունենա: Իսկ առաջընթացի մասին համեստորե՞ն եք լռում՝ հարցին էլ պատասխանեց. «Մտածում ենք առաջընթացի մասին»: Aravot.am-ն էլ հիշում է, որ մի քանի շաբաթ առաջ Գալուստ Սահակյանը ՀՀԿ-ի համար միայն համամասնական ցուցակով 38-40 տոկոս քվե էր ակնկալում:
Կարդացեք նաև
ՀՀԿ խմբակցության ղեկավարին առաջարկեցինք նաեւ մանրամասնել՝ հնարավո՞ր է, որ առաջիկա ընտրությունների արդյունքում ՀԱԿ-ը ՕԵԿ-ից ու ՀՅԴ-ից ավելի շատ քվե ստանա, ինչպես դա եղավ 2009-ին՝ Երեւանի ավագանու ընտրությունների ժամանակ, կամ անգամ իր թիկունքում թողնի ԲՀԿ-ին:
«Այն ժամանակ քաղաքական պայմաններն էին այլ»,- ասաց Սահակյանը՝ շեշտելով, թե ՀԱԿ-ը հիմա այլեւս չունի հասարակության այն վստահությունը, որն ուներ 2009-ին: Նրա կարծիքով՝ այն ընտրազանգվածը, որը ՀԱԿ-ն այն ժամանակ դեռ ուներ՝ այսօր հուսախաբված է, բայց նաեւ հավելեց, թե «այսօր ՀԱԿ-ի ծրագրային դրույթները հրապարակված չեն, երբ դա լինի՝ գնահատականներն ավելի հստակ կլինեն»:
