Աշխատանքի եւ սոցիալական պաշտպանության ոլորտում Հայաստանի եւ Բուլղարիայի Հանրապետության միջեւ ներկայումս օրենսդրորեն կարգավորված համագործակցություն չի իրականացվում: Հաշվի առնելով այդ բացը՝ ՀՀ աշխատանքի եւ սոցիալական հարցերի նախարարությունը Բուլղարիայի Հանրապետության համապատասխան գերատեսչության հետ՝ բուլղարական կողմի նախաձեռնությամբ, մշակել է միջպետական եւ միջկառավարական 2 համաձայնագրերի նախագծեր, որոնցից առաջինը ստորագրվեց երեկ՝ ՀՀ կառավարությունում: Ինչպես հայտնում են աշխատանքի եւ սոցիալական հարցերի նախարարության լրատվական ծառայությունից, նախարար Արթուր Գրիգորյանը՝ խոսելով ոլորտում իրականացվող բարեփոխումների մասին, հույս է հայտնել, որ համաձայնագիրը կնպաստի 2 պետությունների միջեւ համագործակցության զարգացմանը՝ աշխատանքի եւ զբաղվածության, կենսաթոշակային ապահովության, սոցիալական աջակցության, ընտանիքի, երեխաների, հաշմանդամների, սոցիալական երկխոսության եւ այլն. «Մեր մասնագետները վեր կհանեն յուրաքանչյուր ոլորտի կարեւոր հարցերը, որից հետո ավելի առարկայական կդարձնենք մեր անելիքները»:
Ինչ վերաբերում է մյուս՝ «Հայաստանի Հանրապետության եւ Բուլղարիայի Հանրապետության միջեւ աշխատանքային միգրացիայի կանոնակարգման մասին» համաձայնագրի նախագծին, այն այժմ ներպետական համաձայնեցման գործընթաց է անցնում Բուլղարիայի Հանրապետությունում:
«Առավոտ» օրաթերթ