Պարզվում է՝ Կոտայքի մարզպետ Կովալենկո Շահգալդյանը մի հետաքննող լրագրողի կանչել է իր մոտ եւ մի լավ հայհոյել այն բանի համար, որ լրագրողը մի քանի սենսացիոն տեղեկություններ է հրապարակել մարզպետի` աշխատանքի ընթացքում տեղի ունեցած մութ գործերից: Այս մասին այսօր «Ուրբաթ» ակումբում հայտարարեց «Արդյունավետ համայնքային ծրագրի» ղեկավար Սառա Պետրոսյանը` պատասխանելով Aravot.am-ի այն հարցին, թե եղե՞լ են ձեզ կաշառելու դեպքեր, որպեսզի նրանց վերաբերյալ բացահայտած տեղեկությունները չհրապարակեք:
Սառա Պետրոսյանը բացի այս ծրագրի ղեկավարը լինելուց, նաեւ լրագրող է ու ներկայումս հետաքննում է մարզպետների, գյուղապետերի ու քաղաքապետերի կատարած աշխատանքները, մասնավորապես` գումարներն ինչպես են ծախսվում:
Ըստ Սառա Պետրոսյանի, այդ լրագրողը Չարենցավանի բնակիչ է, որն էլ մարզպետի սպառնալիքից հետո ստիպված է եղել աշխատանքը թողնել, քանի որ մտավախություն է ունեցել, որ մարզպետը ընտանիքի հետ էլ հաշվեհարդար կտեսնի: Ծրագրի ղեկավարը ներկայացրեց իրենց հետաքննության արդյունքները: Լոռու, Արագածոտնի, Վայոց ձորի, Կոտայքի մարզերում, ըստ ծրագրի պատասխանատուների, բավականին անկանոն վիճակ է եղել հարկերի մուծման ու ֆինանսական ծախսերի մասով. «Ամենապարզ հաշվարկներից սկսած՝ մարզպետներն այնպիսի ստեր են հորինում, միայն թե խուսափեն հարկերի պարտաճանաչ վճարումից: Հատկապես սոցիալական ծրագրերի անվան տակ են գումարները դուրս գրում ու սեփական հարազատների կարիքները հոգում»:
Տիկին Պետրոսյանի խոսքերով, իրենք ստիպել են համայնքապետերին եւ գյուղապետերին, որպեսզի նրանք ունենան սեփական կայքէջերը՝ հասարակության համար թափանցիկ լինելու համար: Սակայն այդ կայքերը դեռեւս թափանցիկ չեն աշխատում: Այս ծրագրի նպատակներից մեկն էլ տեղական ինքնակառավարման մարմինների աշխատանքի թափանցիկության ապահովումն է:
Կարդացեք նաև
«Իսկ առաջիկայում շատ ավելի կարեւոր հարց է ծառացած, տարբեր մարզերում կան այնպիսի համայնքներ, որոնք ունեն ընդամենը 4 ընտանիք, այսպիսի համայնքների միավորման խնդիրն է շատ կարեւոր, որ դեռեւս ոչ ոքի չի մտահոգում»,- նշեց Սառա Պետրոսյանը՝ հավելելով, որ ավագանիների աշխատանքը կանոնակարգել է պետք, թե չէ գյուղերում ընտանիքի անդամներով են ավագանիներ դառնում ու բացի իրենցից, ոչ ոք ոչնչից տեղյակ չի լինում:
Սյուզաննա ԱՍԱՏՐՅԱՆ
