«Երկրի ողջ ունեցվածքը կենտրոնացել է 10 հոգու ձեռքին: Այսօր երկրում 1 միլիոն 300 հազար աղքատ կա: Ծայր է առել արտագաղթը, մայրերը լաց են լինում, կանայք մնացել են անտեր, անհանգիստ են իրենց որդիների ու ամուսինների համար: Հայ ժողովուրդը պետք է այս ամենից լուրջ եզրակացություն անի և իր ձայնը տա կոմունիստներին»,-պատասխանելով Aravot.am-ի հարցին՝ ո՞րն է այն հիմնական պատճառը, որի համար պիտի ընտրողն իր ձայնը տա կոմունիստներին, ասաց Հայաստանի կոմունիստական կուսակցության ղեկավար Ռուբեն Թովմասյանը :
Նա նաև վրդովվեց ու կրկին հիշեց սովետական անցյալը. «Սովետական տարիներին խուլն էլ, համրն էլ, կույրն էլ աշխատանք ունեին: Եթե որևէ մեկը խուսափեր աշխատանքից, օրենքով պիտի պատասխան տար»:
Ընկեր Թովմասյանը շեշտեց, որ ինքը վստահ է, որ այս ընտրություններին էլ կեղծելու տարաբնույթ մեխանիզմներ են կիրառվելու, մինչև անգամ կարուսել:
Կարդացեք նաև
Մեր հարցին՝ ինչպե°ս կգնահատի միջկուսակցական շտաբի ձևավորման փաստը, ընկեր Թովմասյանը պատասխանեց. «Մենք շտաբի մասնակից չենք եղել, քանի որ հրավեր չենք ստացել: Դա չի աշխատելու, ուղղակի ձևական մի բան է»:
Նշենք, որ կոմունիստները վստահեցնում են, որ եթե գործի չդրվեն կեղծելու մեխանիզմները, իրենք առնվազն 15 տոկոս ձայներ են ակնկալում ընտրություններից:
Տաթև ՀԱՐՈՒԹՅՈՒՆՅԱՆ
