Այսօր «Ազատություն» ռադիոկայանի ֆեյսբուքյան ասուլիսում, որի հյուրն էր Երեւանի փոխոստիկանապետ Ռոբերտ Մելքոնյանը՝ շատերին հայտնի «Բազազ» մականվամբ, Aravot.am-ը խնդրեց մեկնաբանել իր մականվան ծագումնաբանությունը, հատկապես, որ որոշ պատգամավորներ` Ռուբեն Հայրապետյանը (Նեմեց) եւ Առաքել Մովսիսյանը (Շմայս) վերջերս բացահայտել են իրենց մականունների ծագումը:
Իր մականվան ծագումն էլ Ռոբերտ Մելքոնյանն այսպես ներկայացրեց. «Դեռեւս պատանեկան տարիներին, հետագայում էլ` իմ աշխատանքային տարիներին ես երբեւէ մականուն չեմ ունեցել: Սակայն, եթե չեմ սխալվում` 2007 թվականին էր, «Չորրորդ իշխանություն» թերթում ծանոթացա` Մելքոնյան Ռոբերտ` ՊՊԾ գնդի պետ` «Բազազ» մականունով: Իհարկե, զարմացա, որովհետեւ «բազազ» Թիֆլիսի բարբառով նշանակում է վաճառական, առեւտրական, իսկ Մելքոնյան Ռոբերտը այդ վաճառականության կամ առեւտրի հետ բացարձակ կապ չուներ: Երեւի նկատի են ունեցել իմ խստապահանջությունն ու պահանջկոտությունը, որը ինչ-որ տեղ նմանեցնում են հանրահայտ «Գիքորը» պատմվածքին: Ինչեւէ, այդ օրվանից ես դարձա Բազազ»:
Aravot.am-ի հետ զրույցում մեր հարցին՝ կարդալով Ձեզ կպցրած մականունը, ինչպե՞ս հաշտվեցիք դրա հետ, չե՞ք փորձել հերքել կամ պատիվ պահանջել, պարոն Մելքոնյանը պատասխանեց. «Պատիվ չեմ պահանջել, փորձել եմ արհամարհել: Սակայն իսկապես շատ ծանր եմ տարել, իսկ հիմա հումորով եմ վերաբերվում»
Նելլի ԲԱԲԱՅԱՆ
Կարդացեք նաև
