Իսպանիայում ձերբակալված՝ «ալ-Քաիդա»-ի հետ կապեր ունենալու մեջ կասկածվող անձինք: Լուսանկարը տրամադրվել է Իսպանիայի ՆԳՆ-ի կողմից:
Իսպանիայի իշխանությունները հայտնել են «ալ-Քաիդա»-ի հետ կապեր ունենալու մեջ կասկածվող երեք անձանց ձերբակալության մասին:
Իսպանիայի ներքին գործերի նախարար Խորխե Ֆերնանդես Դիասը հինգշաբթի օրը հայտնել է լրագրողներին, թե առկա են «հստակ նշաններ», որ ձերբակալված անձինք ծրագրել են ահաբեկչական հարձակումներ իրականացնել Իսպանիայում կամ Եվրոպայի այլ պետություններում:
Ձերբակալվածներին մեղադրում են նաև պայթուցիկ այնպիսի սարքեր պահեստավորելու մեջ, որոնց բեկորները կարող էին զգալի վնաս հասցնել և որոնց հզորությունը բավարար էր մեկ ամբողջ ավտոբուս ոչնչացնելու համար:
Իշխանությունների նկարագրության համաձայն, կասկածյալներից երկուսը կարող են ծագումով լինել Կովկասի տարածաշրջանից՝ ենթադրաբար ազգությամբ չեչեն, իսկ երրորդ կասկածյալն ազգությամբ թուրք է: Ազգությամբ չեչեն կասկածյալները ձերբակալվել են Իսպանիայի ինքնավար Կաստիլ-Լա Մանչա համայնքում, իսկ ազգությամբ թուրք կասկածյալին ձերբակալել են Լա Լինեա դե լա Կոնսեպսյոն քաղաքում, որտեղ գտնվող բնակարաններից մեկում եռյակը պահեստավորել է պայթուցիկ նյութերը:
Կարդացեք նաև
Իսպանիայի ոստիկանության համաձայն, ձերբակալվածներից առնվազն մեկը նախկինում հաճախել է Պակիստանում գտնվող զինյալների ուսումնական կենտրոններ:
«Ամերիկայի ձայն» ռադիոկայան
