«Թուրքիան Սիրիա կներխուժի միայն այն պատրվակով, որպեսզի Սիրիայի հյուսիս-արևելքում կանխի քրդական բանվորական կուսակցության գործունեությունը: Այս նպատակով Թուրքիան կարող է աջակցել Սիրիայի ապստամբներին»,-այսօր լրագրողների հետ հանդիպմանն ասաց ՀՀ ԳԱԱ Արևելագիտության ինստիտուտի ավագ գիտաշխատող Վահրամ Տեր-Մաթևոսյանը:
Նա փաստեց, որ Թուրքիայի առջև ծառացած կարևոր խնդիրներից է քրդական հարցը. «Քրդերի և Թուրքիայի միջև անջրպետն ավելի է խորանում: Քրդական «Ժողովրդավարություն և խաղաղություն» կուսակցության 25 պատգամավոր և 400 անդամ դեռևս ազատազրկման մեջ են, ինչպես նաև` կալանավորված է 700 ուսանող և 100-ից ավելի լրագրող, ովքեր մեղադրվում են կուսակցության հետ համագործակցելու մեջ»:
Վահրամ Տեր-Մաթևոսյանը նշեց, որ վարչապետ Ռեջեփ Թայիփ Էրդողանի հայտարարության համաձայն` եթե Սիրիան ինքնավարություն շնորհի քրդերին, Թուրքիան այն կընդունի որպես փաստ. «Սակայն իշխանությունները Էրդողանին մեղադրում են ոչ ճկուն քաղաքականություն վարելու մեջ, ինչը կարող է Թուրքիայում քրդական ինքավարության ստեղծման պատճառ հանդիսանալ»:
Բանախոսը հավելեց, որ Թուրքիան Սիրիայի Ազգային խորհուրդը ղեկավարելու լծակներ չունի` չնայած այն հանգամանքին, որ խորհրդի ղեկավարն ազգությամբ քուրդ է:
Կարդացեք նաև
Անդրադառնալով Սիրիայի հայ համայնքին` Վահրամ Տեր-Մաթևոսյանն ասաց, որ վերջինս լուրջ խնդրի առաջ է կանգնած. «Թուրքիան պաշտոնական հայտարարություն չի արել հայ համայնքի մասին, բայց Թուրքիայի համար ավելի հեշտ կլիներ աշխատել քիչ քանակությամբ հայեր ունեցող Սիրիայի հետ»:
Վահրամ Տեր-Մաթևոսյանի խոսքով, Թուրքիայի իշխող կուսակցության մի թևը հակված է կարծելու, որ չվավերացված հայ-թուրքական արձանագրությունները խարան են Թուրքիայի ճակատին, եւ պետք է բացել հայ-թուրքական սահմանը:
Լուիզա ՍՈՒՔԻԱՍՅԱՆ
