ՀՀ ոստիկանությունն այդպես էլ չվճարեց նախկին ոստիկան Մխիթար Ալումյանի արտաժամյա աշխատանքի 2,5 միլիոն դրամ հավելավճարը, ինչի հետեւանքով Ալումյանի դպրոցահասակ 3 երեխաները սեպտեմբերի 1-ին դպրոց չեն կարողանա գնալ:
Ալումյանի 6 ամյա որդու` Նարեկի երազանքը`քույրերի`Կարինեի ու Գայանեի նման դպրոց հաճախել, դպրոցական նստարանի մոտ նստել, գրել-կարդալ իմանալ, չի իրականանա:
Aravot.am-ի հետ զրույցում նախկին ոստիկանի կինը` Շուշանիկ Նասիբովնան ասաց, որ գումար չունեն, որպեսզի երեխաների համար դպրոցական հագուստ ու կոշիկներ գնեն: Տիկնոջ ներկայացմամբ` օրեր առաջ ՀՀ նախագահի աշխատակազմից 50 հազար դրամ են տրամադրել, սակայն այդ գումարով հազիվ հասցրել են գրենական պիտույքներ եւ դպրոցական պայուսակներ գնել երեխաների համար. «Էդ 50 հազարից 7 հազար էր մնացել, էն էլ աղջկաս հիվանդանոց տարանք, անալիզներ պիտի հանձներ, էդ մնացած փողն էլ էդտեղ մուծեցինք: Հիմա խեղճ երեխեքս հագնելու բան չունեն, սեպտեմբերի 1-ին էլ չեմ կարող ծակ կոշիկով, կամ հնամաշ շորերով ուղարկել դպրոց»:
Որպեսզի 3 երեխաները հասակակիցներից ու ընկերներից ետ չմնան, հագուստ ունենան ու դպրոց գնան, մայրը փորձել է պետական «դռներից» օգնություն խնդրել: Մխիթար Ալումյանի տիկինը Aravot.am-ին վստահեցրեց, որ դիմել է իրենց գյուղի` Քաղսիի համայնքապետ Սեդրակ Դավթյանին, սակայն վերջինս մերժել է: Տիկին Նասիբովնան փորձել է իրենց մարզպետ Կովալենկո Շահգելդյանից օգնություն խնդրել, բայց տիկնոջը մարզպետի ընդունարանի աշխատակիցները նրա սենյակին անգամ մոտ չեն թողել` ասելով` «Ի՞նչ ա, ստեղ օգնության հիմնադրա՞մ ա, ի՞նչ ա, որ էկել ես օգնություն ես ուզում»:
«Ամուսնուս աշխատավարձը եթե վճարած լինեին, ես մուրացկանի պես դռները չէի ընկնի: Ախր ամուսինս իր ազնիվ քրտինքով վաստակածն ա ուզում: Մենք մեր հասանելիքն ենք ուզում: Բա ես երեխաներիս ո՞նց բացատրեմ, ինչ սրտով ասեմ, որ դպրոց չեն կարա գնան, մանավանդ որ անհամբեր սպասում են սեպտեմբերի 1-ին»:
Հիշեցնենք, որ արդեն 3 ամիս է նախկին ոստիկան Մխիթար Ալումյանը պարբերաբար բողոքի ակցիաներ` ինքնահրկիզման փորձ, հացադուլ, նստադուլ է կազմակերպում ՀՀ ոստիկանության շենքի եւ նախագահական նստավայրի մոտ`պահանջելով իր աշխատավարձը, ինչը ոստիկանությունը հրաժարվում է վճարել, պատճառաբանելով, որ այն գրանցամատյանները, որտեղ նշված են Ալումյանի արտաժամյա աշխատանքի ժամերն ու օրերը, անհետ կորել են:
Նելլի ԲԱԲԱՅԱՆ
