Այսօր կեսօրին Վանաձորի թիվ 30/28 ընտրատեղամասում քվեարկեց Վանաձոր համայնքի ղեկավարի թեկնածու Կարեն Թումանյանը: Թեկնածուն, իր քաղաքացիական պարտքը կատարելուց հետո, պատասխանելով լրագրողների հարցերին` նշեց, որ մարտական է տրամադրված:
«Մարտական տրամադրվածություն ունեմ, կարծում եմ, որ մեր հասարակությունը իրապես որոշել է փոփոխություն կատարել: Ընտրվելու դեպքում հանրությանը շնորհակալություն կհայտնեմ այն բանի համար, որ իրապես կամք ունեցան փոփոխություն կատարելու: Հետո բոլոր խնդիրներին կանդրադառնանք միասին»:
Ընտրատեղամասի հանձնաժողովի նախագահը փաստեց, որ մինչ թեկնածուի` քվեարկություն կատարելը, խախտումներ չեն արձանագրվել, միայն արձանագրվել է, որ անձնագրերում դրվող դրոշմի թանաքը կարճ ժամանակ անց ցնդում է:
Կարդացեք նաև
«Այն փոխարինվել է սովորական թանաքով: Ընտրողների հոսքը կայուն է, հերթեր չեն գոյանում»,-մեզ հետ զրույցում նշեց հանձնաժողովի նախագահը:
Իսկ մինչ այդ, առավոտյան «Առավոտն» ահազանգ էր ստացել այն մասին, որ Լոռու մարզի Շահումյան համայնքի ղեկավարի թեկնածու Էդիկ Մանուկյանի կինը բացահայտ քարոզչություն է իրականացնում:
«Թեկնածուի կինը բացահայտ քարոզչություն է իրականացնում ընտրական տեղամասի առջեւ` մարդկանց ուղղելով հետեւյալ հարցը` գիտես, չէ, ում ես ընտրելու»,- մեզ հետ զրույցում պատմեց նույն համայնքի ավագանու անդամի թեկնածու Արփինե Մարտիրոսյանը:
Վանաձոր