«Բնակչության իրավիճակը այն տարածքներում, որոնք տուժել են ռուս-վրացական պատերազմից» թեմայով զեկույց պատրաստելու նպատակով հոկտեմբերի 9-10-ը Մոսկվայում է գտնվում ԵԽԽՎ միգրացիայի, փախստականների և տեղահանված անձանց հարցերով հանձնժողովի անդամ Թինա Ակետոֆթը:
Ինչպես տեղեկանում ենք ԵԽԽՎ կայքից, զեկուցողն իր մոսկովյան այցի շրջանակներում հիմնականում հանդիպումներ կունենա Մոսկվայի իշխանական օղակների և քաղաքացիական հասարակության ներկայացուցիչների հետ:
Ընդհանրապես Ռուսաստանում մարդու իրավունքների պաշտպանության հարցը ԵԽԽՎ աշնանային նստաշրջանի կիզակետում էր: ԵԽԽՎ նստաշրջանի 2-րդ օրը Վեհաժողովը Ռուսաստանի կողմից ԵԽ-ի նկատմամբ վերջին յոթ տարիների ընթացքում իր պարտականությունների թերացմանը վերաբերող բանաձև ընդունեց: Բանաձևը սուր քննադատության ենթարկեց 2012թ. ռուսական խորհրդարանի կողմից ընդունած մի շարք օրենքներ: Մասնավորապես, խոսքը «օտարերկրյա գործակալների» և բանսարկության համար նախատեսված քրեական պատասխանատվության, ինչպես նաև համացանցում տեղեկության վերաբերյալ օրենքների մասին է: Բանաձևի հեղինակները կոչ են անում նաև Մոսկվային վերանայել Pussy Riot խմբի նկատմամբ կայացրած դատավճիռը, դադարեցնել խաղաղ ցուցարարների նկատմամբ բռնությունները: ՌԴ-ին կոչ արվեց նաև չեղյալ համարել Հյուսիսային Օսեթիայի և Աբխազիայի անկախության ճանաչման փաստը:
Կարդացեք նաև
Մինչ բանաձևի ընդունումը նստաշրջանի ընթացքում ԵԽԽՎ պատվիրակներն իրենց մտահոգությունը հայտնեցին Ռուսաստանում մարդու իրավունքների պաշտպանության առիթով: Օրինակ՝ ռումինացի պատվիրակ Գեորգի Ֆրունդան իր մտահգությունը հայտնեց այն կապակցությամբ, որ բազում սպառնալիքներ են գրանցվել ՌԴ-ում մարդու իրավունքների պաշտպանությամբ զբաղվող մասնագետ Տանյա Լոկշինայի նկատմամբ: Նա Վեհաժողովին ահազանգեց. «Ես մտահոգված եմ այն վայրենի մթնոլորտով, որ տիրում է Ռուսաստանում մարդու իրավունքների պաշտպանությամբ զբաղվող անձանց նկատմամբ: Տիկին Լոկշինայի բջջային հեռախոսին ուղարկված սպառնալիքները անթույլատրելի են: Այն փաստը, որ սպառնալիքները վերաբերում են նրա անձնական կյանքին, կասկածներ են հարուցում, որ այդ գործում անվտանգության մարմինների մատը խառն է: Ես կարծում եմ, որ իշխանությունները պետք է հրատապ քայլեր ձեռնարկեն նշված իրավիճակը շտկելու համար»:
Տեղեկացնենք, որ Ռուսաստանի նկատմամբ ընդունված բանաձևով Վեհաժողովը «ՌԴ իշխանություններին պարտավորեցնում է ապահովել մարդու իրավունքների պաշտպանությամբ զբաղվող անձանց նկատմամբ իրականացված վիրավորանքի և ճնշումների կապակցությամբ հետաքննություն և դատական կարգով պատժել հանցագործներին»:
Տաթև ՀԱՐՈՒԹՅՈՒՆՅԱՆ
