Իրանում սկսվել են 4-րդ դարի Սուրբ Հռիփսիմե եկեղեցու վերականգնման աշխատանքները, որը բավականին տուժել էր այս տարվա օգոստոսի 11-ին Իրանում տեղի ունեցած երկրաշարժից: Հաղորդում է «Բլագովեստ-ինֆո» լրատվականը՝ հիմնվելով Ատրպատականի Հայոց թեմի հաղորդագրությանը:
Եկեղեցին գտնվում է Թավրիզ քաղաքից 47 կմ դեպի հյուսիս-արևմուտք հեռավորության վրա: Ատրպատականի թեմի առաջնորդ արքեպիսկոպոս Գրիգոր Չիֆճյանը լրատվականին հայտնել է, որ վերանորոգման ծախսերը հոգում է Իրանի Իսլամական Հանրապետությունը:
Հնագետների կարծիքով, Սուրբ Հռիփսիմե եկեղեցին կառուցվել է մեկ այլ եկեղեցու վայրում: Ըստ ունեցած տվյալների, այդ եկեղեցին կարող է 3-րդ դարի թվագրություն ունենալ: Նաև հաստատվել է, որ եկեղեցին վերականգնվել է 1691թ., ինչի մասին վկայում է եկեղեցու արևմտյան պատի համապատասխան գրություններով մարմարե հուշատախտակը:
Իրանի մշակույթի նախարարությունը Սուրբ Հռիփսիմե եկեղեցին ու հարևանությամբ գտնվող Սուրբ Աներևույթ մատուռի ավերակները գրանցել է պատմական հուշարձանների պահպանության ցուցակում: Ըստ ավանդության, մարդիկ երկնքից իջնող լույս են նկատել մատուռի տարածքում, որը հայտնվել ու վերացել է անսպասելիորեն: Նրանք դա ընկալել են որպես Աստծո կողմից ուղարկված նշան և այդ վայրում մատուռ են կառուցել:
Կարդացեք նաև
Պատրաստեց Հովհաննես ԻՇԽԱՆՅԱՆԸ
