Այսօր Հայաստանի պետական տնտեսագիտական համալսարանի հանդիսասրահում մեկնարկեց Հայաստանի ուսանողական ազգային ասոցիացիայի կազմակերպած 6-րդ Ընդհանուր ժողովի լիագումար նիստը:
ՀՊՏՀ ռեկտոր Կորյուն Աթոյանը նշեց, որ խրախուսում է ակտիվ եւ գիտակից ուսանողություն ունենալու հանգամանքը. «Համալսարանը Հայաստանի ուսանողական ազգային ասոցիացիայի հետ հայմատեղ կազմակերպել է բազմաթիվ միջոցառումներ, որոնք ամենաբարձր մակարդակով են անցել: Այն հանգամանքը, որ ասոցիացիան համախմբում է ուսանողության 70 տոկոսին, մեզ ուրախացնում է: Ասոցիացիան առավել քան երբեւէ ուշադրություն է դարձնում բարձրագույն կրթության համակարգում ուսանողության ներգրավման խնդրին. այդ համակարգում ուսանողը պետք է լինի ոչ թե դիտորդ, այլ գործի կրող եւ շահառու»:
ԵՊՀ ռեկտոր Արամ Սիմոնյանը փաստեց, որ ընդհանուր ժողովն առիթ է երիտասարդության առջեւ ծառացած խնդիրները քննարկելու համար. «Հաճախ այդ խնդիրները քննարկում են ոչ ֆորմալ մակարդակով այն պարագայում, երբ չափազանց լուրջ են: Կցանկանայի, որ խնդիրները քննարկվեին լուրջ մակարդակում եւ ցույց տրվեին ելքերը: Բացի այդ, անհրաժեշտ է քննարկել Հայաստանի ուսանողական ազգային ասոցիացիայի անդամակցման խնդիրը Եվրոպական ուսանողական ասոցիացիային: Դա մեծ հնարավորություններ կընձեռի, հատկապես` կրթությունը Եվրոպայում շարունակելու գործում»: Սիմոնյանի խոսքով. «Հասարակությունը պետք է գա այն գիտակցման, որ Հայաստանի ուսանողական ազգային ասոցիացիային անդամակցելը բխում է բոլոր ուսանողական կառույցների շահերից»:
Կարդացեք նաև
Հայաստանի պետական ճարտարագիտական համալսարանի ռեկտոր Արա Ավետիսյանը փաստեց, որ լավ ուսանող լինելը հատկապես կարեւոր է երկրի ապագա քաղաքացի լինելու տեսանկյունից. «Նորանկախ պետության կայացման ճանապարհին յուրաքանչյուր գրաճանաչ մարդ կարող է ներկայացնել պետության ձեւավորման իր որոշումները եւ հասկանա, որ պետք է այն հասարակության անդամը դառնա, որի մասին երազում է: Ուսանողությունը առավել մեծ ներուժ ունի քաղաքացիական հասարակության ձեւավորման գործում»:
Լուիզա ՍՈՒՔԻԱՍՅԱՆ
