«Սերժ Սարգսյանը Բադալյան Յուրային պիտի աշխատանքից հաներ, որվհետեւ ինքը զոհվածի ծնողին անպատվել է, վիրավորել է, հրել է, բրթել է, տեսանյութերն էլ կան, բայց առ այսօր ոչ մի պատասխան չենք ստացել մեր դիմումներին: Երկու դիմում ենք գրել»,- այսօր Aravot.am-ի հետ զրույցում պատմում էին բանակում զոհված զինծառայողների մայրերը, որոնք նախագահական նստավայրի մոտ բողոքի ակցիա էին անում: Հիշեցնենք, որ ՀՀ զինվորական դատախազության ՀԿ քննիչ Յուրա Բադալյանը, ըստ տարածված տեղեկատվության, քաշքշել էր զոհված զինծառայողների մայրերին, վիրավորել, իսկ նրանցից Իրինա Ղազարյանին՝ զոհված Արթուր Ղազարյանի մորը, անվանել է «պոռնիկ»:
2007-ի օգոստոսի 30-ին Վարդենիսի Կարճաղբյուրի զորամասում կասկածելի հանգամանքներում մահացած Տիգրան Օհանջանյանի մայրը՝ Գոհար Սարգսյանը մեզ հետ զրույցում պատմեց. «Այն ժամանակվանից ես պայքարում եմ, բողոքում եմ, իրենք պնդում են, որ իմ երեխեն էլեկտրահարվել է: Դեպքի վայրում ոչ մի էլեկտրասյուն, ոչ մի նման բան չկա, ինչ իրենք են նկարագրել: Նրան սպանել են: Մարդասպանները իրենց կողքն են, նույն այդ զորամասում են: 2001-ին սպանել են՝ չեն պատժվել, 2007-ին սպանեցին, դա շարունակվում է: Եթե մեր նախագահն ուզում է իր աթոռը պինդ բռնել, թող պատասխանատվություն վերցնի իր վրա, որովհետեւ համարվում է գերագույն գլխավոր հրամանատար: Նա գոնե պիտի գոնե այս աղմկահարույց դեպքերը բացահայտի: Մարտի 1-ին 10 զոհերի դատաբժշկական եզրակացություն Վիգեն Ադամյանն է տվել, այդ նույն դատաբժիշկը եղել է իմ երեխու դատաբժիշկը, որը վնասվածքները չի նկարագրել: Ասել է՝ հոսանքահարվել է: Եթե հոսանքահարվել է՝ իմ երեխու ատամը չկա, իմ երեխու շորերը պատռված են: Երեւի բոլորը հոսանքն է արել: Ինչի՞ մասին է խոսքը»:
Տիկին Սարգսյանն ուզում էր որպես ծնող իմանալ՝ ո՞րն է որդու սպանության դրդապատճառը, ի՞նչ է պատահել նրան. «Ես ծնող եմ, ես ուզում եմ իմանալ՝ ի՞նչ է արել իմ երեխեն, որ սպանել են: Թող ասեն՝ չենք սպանել, դժբախտ պատահար է եղել, բայց դա էլ չեն կարողանում ապացուցել: Թող ապացուցեն իրենց սարքած քրեական գործը: Այդ ցավն ավելի տանելի է, քան որ իմանաս՝ քո երեխուն սպանել են: Իմ վիշտն այնքան մեծ է, ինչի՞ պիտի ես փնտրեմ մարդասպանին: Իմ երեխուն սպանել են Կարճաղբյուրի զորամասում: Կորպուսի հրամանատարն եղել է գեներալ-լեյտենանտ Հայկազ Բաղմանյանը: Եթե Հայկազ Բաղմանյանի նստավայրը հենց Կարճաղբյուրում է, իմ երեխուն սպանել են 15 մետր հեռավորությամբ, իր թիկնապահների սենյակում, ումի՞ց ինչ պահանջեմ: Այսօր Բաղմանյանն ո՞ւր է՝ կորպուսի հրամանատարի պաշտոնից հանեցին, բերեցին Խաչատուրովի կողքը նստացրեցին: Ախր ցավ է ինձ համար: Ո՞վ է Հայկազ Բաղմանյանը՝ մեր նախագահի զինակից ընկերը, էլ ո՞ւր ենք հեռու գնում»:
Վայքի զորամասերից մեկում սպանված Արայիկ Ավետիսյանի մայրը՝ Անահիտ Մկրտչյանն էլ վստահեցրեց, որ իր որդու սպանության դրդապատճառն էլ է հայտնի, սպանություն կատարող անձն էլ է հայտնի, բայց 2009-ին գործը կասեցրել են՝ սպանություն կատարող անձը անհայտ լինելու պատճառաբանությամբ. «Այն պարագայում, որ 9 քմ սենյակում 4-5 հոգու ներկայությամբ են տղայիս սպանել՝ 100 դոլարի համար, որովհետեւ արձակուրդի պետք է գնար 100 դոլար տալու պայմանով, բայց գնաց 15.000 դրամով»:
Կարդացեք նաև
Հռիփսիմե ՋԵԲԵՋՅԱՆ
