Պայմանական վաղաժամկետ ազատման հանձնաժողովը երկրորդ անգամ իրեն դիմելուց հետո դրական պատասխան էր տվել խարդախությամբ՝ խաբեության կամ վստահությունը չարաշահելու եղանակով, կաշառք ստանալու պատրվակով, խոշոր չափերի հափշտակություն կատարելու համար Լոռու մարզի առաջին ատյանի դատարանի վճռով 2 տարվա ազատազրկման դատապարտված Հենրիկ Հակոբյանի համար «Վանաձոր» ՔԿՀ-ի միջնորդությանը եւ օրենքով նախատեսված կարգով Լոռու մարզի առաջին ատյանի դատարանի կայացրած որոշման հիման վրա նրան պայմանականորեն ազատել պատժի կրումից:
Լոռու մարզի ընդհանուր իրավասության դատարանը, նախագահությամբ դատավոր Նարինե Հովակիմյանի, 2 տարվա ազատազրկման էր դատապարտել Հայաստանի պետական ճարտարագիտական համալսարանի Վանաձորի մասնաճյուղի հեռակա ուսուցման բաժանմունքի վարիչ Հենրիկ Հակոբյանին:
Համաձայն մեղադրական եզրակացության՝ վերջինս իր աշխատասենյակում խարդախությամբ կաշառք ստանալու պատրվակով Սարգիս Դիլբարյանից հափշտակել էր խոշոր չափի՝ 562.305 դրամին համարժեք 1500 ԱՄՆ դոլար:
Նրա փաստաբան Ռուբեն Հակոբյանը հենց սկզբից էլ համամիտ չէր նշանակված պատժատեսակի եւ պատժաչափի հետ, քանի որ, ըստ փաստաբանի, կային բոլոր հիմքերը իր պաշտպանյալի նկատմամբ տուգանք նշանակելու կամ պատիժը պայմանականորեն չկիրառելու համար:
Կարդացեք նաև
«64 տարեկան գիտությունների թեկնածու, դոցենտ, նախկինում չդատված, դրական բնութագրվող, ամուսնացած, մեղքը ընդունած, խոստովանական ցուցմունք տված, քննությանը աջակցած անձնավորության նկատմամբ կարող էր կիրառվել մեղմ պատիժ»,- «Առավոտի» հետ զրույցում ասել էր նա:
Հենրիկ Հակոբյանը, սակայն, չէր վիճարկել առաջին ատյանի դատարանի կայացրած դատավճիռն ու մինչ այդ պատիժը կրում էր «Վանաձոր» ՔԿՀ-ում:
«Պայմանական վաղաժամկետ ազատում թույլատրվում է բոլոր տեսակի հանցագործությունների, այդ թվում՝ եւ ծանր, եւ առանձնապես ծանր հանցագործությունների դեպքում: Տվյալ դեպքում միջնորդությունը բավարարվեց երկրորդ անգամից, երբ արդեն Հենրիկ Հակոբյանը պատժի մեծ մասը կրել էր»,-«Առավոտի» հետ զրույցում նշում է փաստաբան Ռուբեն Հակոբյանը՝ բացատրելով, որ հազվադեպ է պատահում, երբ վերոնշյալ հանձնաժողովը դրական պատասխան է տալիս: Փաստաբանի փոխանցմամբ՝ Հենրիկ Հակոբյանը այժմ չի աշխատում:
ԱՆՈՒՇ ԲՈՒԼՂԱԴԱՐՅԱՆ
Վանաձոր
«Առավոտ» օրաթերթ
