Ընդդիմությունը բողոքում է անհավասար լուսաբանումից
«Շատ գեղեցիկ պատրաստված տեսահոլովակ է, որի բովանդակությունը, ցավոք, չի համապատասխանում այսօրվա Հայաստանի իրական վիճակին: Այն Հայաստանում, որը ցուցադրված է այդ տեսահոլովակում, ես էլ կուզենայի ապրել: Բայց ցավոք, այդ Հայաստանը չի մեր այսօրվա իրականությունը, որն այդտեղ ներկայացված է»,- Սերժ Սարգսյանի քարոզչական տեսահոլովակի մասին Aravot.am-ին այսպիսի կարծիք հայտնեց Րաֆֆի Հովհաննիսյանի նախընտրական շտաբի խոսնակը՝ Հովսեփ Խուրշուդյանը:
«Եվ ամենակարեւորը՝ այնտեղ նույնիսկ ներգաղթի էլեմենտ էր ցուցադրված, որ ինչ-որ մեկը վերադառնում է: Բայց մենք տեսնում ենք, որ Սերժ Սարգսյանի պաշտոնավարման ընթացքում շուրջ 200 հազար մարդ արտագաղթել է: Այսինքն՝ մի քիչ տարօրինակ է նման շեշտադրումներ անելը՝ նման բեքգրաունդ, նման պաշտոնավարում ունենալով»,- ասաց պարոն Խուրշուդյանը:
Մեր դիտարկմանը, որ տեսահոլովակը հույս ու հավատ է ներշնչում, որ այդպես է լինելու, ոչ թե այսօրվա վիճակն է ներկայացնում՝ Հովսեփ Խուրշուդյանը պատասխանեց. «Գիտեք, բոլորս այդ հույս ու հավատն ունենք, բայց դա պետք է ապացուցեր պաշտոնավարման տարիներին, նախկին գործերով եւ նախկին հնարավորությունները, իշխանություններն օգտագործելու արդյունավետությամբ: Եթե դա չի եղել, եւ հակառակն է եղել, ուրեմն մարդիկ իրավունք ունեն չհավատալ, որ այդ հույսերն ու խոստումները կիրականացվեն հաջորդ անգամ»:
Կարդացեք նաև
Դեռ քարոզարշավը նոր է մեկնարկել, բայց ընդդիմությունն արդեն նկատել է անհավասար մոտեցում՝ թեկնածուների համար: «Մենք երեկվանից սկսեցինք նայել, թե հեռուստաընկերությունները ում քարոզարշավի սկիզբը ոնց մեկնաբանեցին: Դա արդեն ցույց է տալիս, որ այնպես չի, որ իշխող թիմը վստահ է, որ հաղթելու է: Եթե վստահ լինեին, որ հաղթելու են, ավելի հանգիստ կվերաբերվեին, ավելի քիչ նյարդային վիճակ կլիներ իրենց մոտ: Դա ցույց է տալիս, որ իրենք մեծ մտահոգություններ ունեն, եւ կարծում եմ, որ իրենց մտահոգությունները տեղին են, քանի որ իրենք պարտվելու են: Այն մասշտաբները, որով նախագահի թիմը պատրաստվել է այդ քարոզչությանը, այն ծախսերը, որ արվել են, նաեւ անհավասարությունը, որն արդեն երեւում է լուսաբանմամբ՝ ակնհայտ է»:
Հռիփսիմե ՋԵԲԵՋՅԱՆ
