Սերբ դրամատուրգ Սինիշա Կովաչեւիչի «Վիրուս» պիեսը բեմադրվել է Հայաստանում:
Այսօր Պատանի հանդիսատեսի թատրոնում կայացավ Հակոբ Ղազանչյանի բեմադրած «Վիրուս» ներկայացման պրեմիերան` ըստ սերբական պառլամենտի անդամ, հայտնի դրամատուրգ Սինիշա Կովաչեւիչի պիեսի: Դահլիճում էր նաեւ հեղինակը` Հայաստանում Սերբիայի դեսպանի հետ, որին կատակով իր անձնական լրտեսն անվանեց Հայաստանում: Սինիշա Կովաչեւիչը ներկայացման ավարտին ասաց, որ իր համար մեծ պատիվ է գործը բեմադրված տեսնել Հայաստանում: Նա մի շարք ընդհանրություններ նշեց հայ եւ սերբ ժողովուրդների մշակույթների միջեւ:
«Ուզում եմ, որ մշակութային կամուրջ գցենք, որի հիմքերը դրել ենք ես եւ Հակոբ Ղազանչյանը իմ պիեսով ու իր բեմադրությամբ»,-նշեց դրամատուրգը:
Կարդացեք նաև
Բեմադրությունը ժամանակակից մարդու մասին է, որ մեկ նյարդերի կծիկ է , մեկ անտարբերության մարմնացում, բայց անհոգ է եւ ուրախ, եւ երբ սիրում է` պատրաստ է ամեն ինչի: Ու էդ բոլորը հյուսված է ՄԻԱՎ/ՁԻԱՀ կործանիչ վարակի շուրջ:
«Վիրուսի» գլխավոր դերակատարը միայնակ տառապում է, որովհետեւ վարակակիր է, հարազատները երես են թեքել, սիրած աղջիկը` նույնպես: Այդ պատճառով էլ մեկուսացված հերոսը գազանացել է ու վրեժխնդիր է լինում իր հետ գազանաբար վարված հասարակության հետ:
«Վիրուսում» հրաշալի էին խաղում բոլորը` Իշխան Ղարիբյանը, Արմեն Սանթրոսյանը, Անահիտ Բաբելյանը, Սամվել Դանիելյանը, Մարիամ Ղազանչյանը եւ Գոհար Կարապետյանը: Հաջողված էին եւ բեմադրությունը` ամբողջության մեջ, եւ երաժշտական ձեւավորումը: Լավ էի աշխատել նաեւ նկարիչը` Անտոն Քեշիշյանը:
Գոհար ՀԱԿՈԲՅԱՆ
